Kashmirimi muslimit inunnik arfinilinnik aallarussipput
Illoqarfeeqqami, hinduismimik upperisaqarfiunerusumi, Jamomi sakkulersortut muslimit Pakistanimeersuunissaat ilimagineqarpoq. Tassani politiitut atisaqarlutik takkukkamik inuit sakkutuujunngitsut marluk politeerlu ataaseq toqoriarlugit arfinillit aallaruppaat, aallarussat marluk meeraapput. Sapaatip akunnerini arlalinni Kashmirimi perulluliortoqartareersorlu ullumi sakkulersortoqarpoq. Kashmirimi qooroq naalakkersuisunit hindunut naalaffiliorfissangorlugu tunniunneqarmat muslimit sakkortuumik akerliummata nunaminertamik tunniussigaluarneq tunuarteqqiinnarneqarmat hindut akerliummata pissutsit najummassimanarsipput. Indiamiit Kashmirimut aqqutit assersorneqarmata Kashmirimut nerisassanik pilersuineq ajornarsimmat naalakkersuisut sukannersumik naalakkersuilerput. Pakistanip Indiallu naalakkersuisuisa qanoq Kashmir killeqarfeqassanersoq isumaqatigiinniutiginerani ukiorpaalunni eqqissiviilliortoqarpiarnikuunngilaq, indiamulli qaninnersaani muslimit Pakistanimut atalersinnaanngikkunik namminersulerusullutik malartaasertuarput. Isumaqatigiinnginneq Pakistanip Indiallu pingasoriarlutik sorsuussutiginikuuaat, inuillu 100.000-illit toqutaanerannik taakkua kinguneqarnikuullutik. Pakistanimi naalakkersut ulluni makkuni sanngiillinerat musliminit sakkulersorniartunit atornerlunniarneqartoq alapernaatsunit ilimagineqarpoq.
