Kashmirimi hindut 26-it toqunneqarput

Indiami nunap immikkoortortaata ilaani, Kashmirimi, hindut 26-it, angutinit sakkulersorsimasunit toqunneqarsimapput. Sakkulersorsimasut tassaasorineqarput sakkutuut muslimiusut.

Naalagaaffimmi atorfillit ullumi taama nalunaarput.

Oqartussaasut naapertorlugit toqutsinermut pissutaanerarneqarput, siullermik: peqqarniisaarnerup annertusarniarneqarnera, aamma naalakkersuisut immikkoorniallu ingasattajaanngitsut eqqissineqarnissaa anguniarlugu isumaqatigiinniarnerat ajalusoortinniarsarineqarnerarlugu.

Kashmirip kujasinnerusortaani immikkoortortami qaqqartoorsuarmi, Dodami, hindorpassuit ippassaq unnukkut kingusissukkut qimagussorneqarsimapput. Politiit tamaani ittuat oqarpoq, hindut qimagussortinniarneqarneranni inuit ikinnerpaamik 22-toqutaasimasut.

- Hindut siuleriiaarteriarlugit aallaaneqarlutik toqorarneqarput, politiit ittuat oqarpoq, aamma nalunaarutigalugu allat arfineq-pingasut ikiligaasut.

Sakkutuut muslimiusut pasitsatsitsiniaratik uniformilersorsimallutik innuttaasut ataatsimiigiarnissaannik ussiataarlugit oqaluffisimavaat.

Kashmirimi sakkutuut gruppit assigiinngitsut 20-nit amerlanerit toqutsineq akisussaaffigerusussimanngilaat.

Ukiut pingasut tamaani hindunik saassussisoqarsimanani kingumut peqqarniisaartoqaqqippoq.

Kashmirip indiamiunit 1989-imili aqunneqarnera akerleralugu muslimiunerusut ikinnerpaamik 44.000-it

manna tikillugu toqutaareerput.