Karl Tobiassen: Aaqqiisoqareerpoq aaqqiisoqaqqinniarporlu

Uummannap Kommuneani ilinniartitsisussaaleqineq aaqqiiviginiarneqartariaqartoq angajoqqaajusut ilaata, Karen Cortzenip, piumasarigaa, ulloqeqqaanerani radioaviisimi tusarliupparput.

Tamannali 2005-imili aaqqiiviginiarneqalereersimasoq, Uummannami Meeqqanut Kultureqarnermullu ataatsimiititaliap siulittaasuata Karl Tobiassenip oqaatigaa.

Ukiuni aalajangersimasuni ilinniartitsisutut atorfinitsitsinikkut tamanna anguniarneqartoq Karl Tobiassenip oqaatigaa, nangillunilu:

- Edvard Kruse-p Atuarfiani ilinniartitsisussaqarniarneq ukiup ingerlanerani assigiinngitsutigut nikerartarpoq, assersuutigalugulu decembarip aamma januaarip qaammatai ilanngullugit barselsorlovertoqarpoq, sivisuumillu napparsimasoqarluni, Karl Tobiassen oqarpoq, nangillunilu:

- Vikariliisoqarnikkulli, tiimissallu allanngortiternerinik aaqqiivigineqarput, meeqqallu atuareersunut paaqqinnittarfimmukartinneqartartut sammisassaqartinneqartarput, ataasinngornermiit tallimanngorneq ilanngullugu, Karl Tobiassen oqarpoq.

Ilinniartitsisussaaleqineq qaangerniarlugu apriilip qaammataata ingerlanerani Uummannap atuarfeqarfiini arfineq-pingasuusuni pisortat atorfilittallu isumasioqatigiissinniarneqarput.