Karl Siegstad toqukkut qimaguppoq

Nunatsinni oqaluttuallaqqissorsuit ilaat toqukkut qimaguppoq. Atuakkiortoq inuiaqatigiinnullu tunngasunik isummersortartoq Karl Siegstad 79-inik ukioqarluni toqukkut ippassaq qimaguppoq.
Allattoq Louise M. Kleemann
januaarip 18-at 2010 09:33

Henriette Rasmussenip Atuakkiorfimmi pisortaanermi nalaani Karl Siegstad arlaleriarluni suleqatigisarsimavaa.

- Karl Siegstad oqaluttuallaqqissorsuuvoq, kalaallit Nunaata kulturia pillugu atuakkiortarsimavoq, aamma suliarpassuaqarpoq nunaqqatiminillu assut nuannarineqarluni, Henriette Rasmussen oqaluttuarpoq.

- Kisianni oqaluttuaasa atuaganngortinnissaat ilungersunartarsimaqaaq, Henriette Rasmussen qungujulalluni oqarpoq.

Karl Siegstad Aasianni inunngorpoq, Savissivimmi meeraallunilu peroriartorpoq, inuunermilu ilaani umiartortuusimalluni. Aasiannut uternermi kingorna kommunalbestyrelsimi Atassut sinnerlugu ukiuni arlalinni ilaasortaasarsimavoq.

Karl Siegstad inuiaqatigiinut tunngasunik oqallinnermut peqataalluartarnerminik ilisimaneqarpoq, pingaartumik killiligaanani oqaaseqarsinnaanermut tunngasunik inuillu pissakinnerusut tusaaniarneqarnissaannik tunngasunik suliaqartarsimalluni.

Karl Siegstad Atuakkiorfimmit 2003-mi akissarsitinneqarpoq aammattaaq kalaallit kulturiannik inooriaasiannillu qasusuilluni sorsuutiginninni tunngavigalugu Juullip nipitittagaanit 2009-mi nersornaaserneqarpoq.

Karl Siegstadip atuakkiaa kingulleq ateqarpoq ”Qimussersuinngooq”, atuakkiai tassaapput Piumasarput malissiuk, Inuunerup sarfarissinerani, Kunuunnguakkullu naapeqisugut, Iluliarsuit oqquanni kiisalu Qimussernerup silarsuaani.

Aamma atuaruk