Karl Lyberthip tunuarnissaa piumasarilerpaat

 Tamanna Sinerissap Qanittuani Aalisartut Piniartullu Kattuffiata ilaasortaminut ippassaq ataatsimiisitsinerani erserpoq.

- Tassa oqartariaqarpugut pissutsinik naammaginnikkunnaavissimapput aalisartut tupinnanngitsumik. Aamma siornakkunnut pisimasunut utersaartoornartupilussuuvoq. Tassami neriorsugaareernikuuvugut sakkortoorujummik politikkimik allannguisoqarmat, Anthon Lindenhann, Sinerissap Qanittuani Aalisartut Piniartullu Kattuffiani siulittaasoq taama oqarpoq, nangillunilu:

- Taavalu siorna aalisartut atugaaniit suli ajornerusumik ajornerusumik ullumikkut pisoqarpoq. Taamaammat tassa akerliussutsimik takutitsinissaq piareersarneqarpoq apeqqutaaginnarluni Naalakkersuisut qanoq akiumaarnersut, Anthon Lindenhann oqarpoq. Taassuma Karl Lyberthimik septembarip tallimaani  ataatsimeeqateqarsimanini pillugu umiatsiaararsorlutik aalisartut ippassaq ataatsimiisippai. Umiatsiaararsortullumi Karl Lyberthimut tatiginnikunnaarsimapput Aalisarnermullu Naalakkersuisutut tunuartariaqarneranik oqariartuuteqartarsimallutik:

- Tassa ataatsimiittut taamannak oqariartuuteqaqattaarput. Kisianni oqareernittuut akissutissaa utaqqeqqaarniarparput oqariartuuteqannginnitsinni.

Karl Lyberth Inatsisartut ataatsimiinnissaannut piareersarluni ulluni makkunani ulapputeqartoq radioaviisimit oqaaseqartitsiniaraluaratsigu iluatsinngilarput.

Qeqertarsuup Tunuani umiatsiaararsorlutik qaleralinniat immikkut 700 tonsinik misileraatigalugu qaleralittassaminnik septembarip aallaqqaataaniit tunineqaraluarput. Umiatsiaararsortulli ukiup taamaalinerani misileraatitsisoqarniarnera akuerisinnaanngilaat.