Karl Lyberthip Qeqertarsuup Tunua niaqorluutigaa
Aalisarnermut, piniarnermut nunalerinermullu naalakkersuisoq sinerissamut qanittumi qaleralinniarneq qanoq siunissaqarnersoq aperineqarami, nutaarsiassat nuannernerusut aallarniutigai.
- Uummannap pigisaani qaleralittassat ikinnerpaamik 1.000 tonsinik ilasinnaassagunarpagut Upernaviullu pigisaani aamma 1.000 tonsinik ilallugit. Qeqertarsuulli Tunuanut tunngatillugu, inaarutaasumik aalajangiitinnata misissuilluaqqaartariaqarpugut, Karl Lyberth oqarpoq.
Sinerissap qanittuani avataanilu qaleralinniarpassuit pisassiissutit qaffanneqalaarnissaat qilanaarisinnaavaat. Karl Lyberthilli qaleralinniarfissuaq kujasinnerusumiittoq eqqartuleramiuk ilumoorsaarpalunnerulerpoq.
Qeqertarsuup Tunuani qaleralinniarneq aalisarnermut naalakkersuisuusarsimasunik ilungersortitsisarsimavoq. Royal Greenland aningaasanik ilanngartuiffiginngikkaluarlugu aalisakkanillu tunisassiortut allat qimaatinngikkaluarlugit aaqqiissutissamik tamanit iluarineqartumik nassaarniartillutik allaat niaqorluutigingajattarsimavaat:
- Qeqertarsuup Tunuanut tunngatillugu niaqorluutigineqartoq tassaavoq, aasaanerani aalisartut amerlavaartarnerat taamatullu aamma pisassiissutinik nunguutsipallattarnerat. Aalisartut iliuuserisartagaat paasisinnaalluarpakka, aalisakkammi pisatik akigissaartikkusuppaat, Qeqertarsuullu Tunuani akigitinneqartut Uummannamut Upernavimmullu naleqqiullugit akigissaarnerungaatsiarput. Kujavartertarnerat paasisinnaalluarpara, naalakkersuisoq oqarpoq.
Karl Lyberthip aalisartut qaleralinniarfissuarmut kujavartertarnerat paasilluarsinnaagaluarlugu, inatsisiliornerup sutigut tamatigut allanngortinneqarnissaa maanna isumaliutigaa, Qeqertarsuup Tunuani aalisakkat Qeqertarsuup Tunuamiuniinnaq aalisarneqarsinnaasunngorlugit.
Upernavimmi Uummannamilu qaleralittassanik qaffaanermik Karl Lyberthip pilersaarutaa imaassinnaavoq sumiiffinni taakkunani aalisarnissamik illuatungeriinnut tamanut pilerinarnerulersitsissasoq. Pilersaarut taanna atorlugu, aalisartut aalisakkanillu tusassiortut amerlippata, akit immaqa qaffassinnaassapput. Tamannali suli nalunarpoq.
- Qaleralittassat tatineqarnerinik millisaataasinnaasunik assigiinngitsunik Naalakkersuisuni suliniuteqarnerput taamaallaat oqaatigisinnaavara. Sunik pilersaaruteqarnerluta maannakkorpiaq oqaatigisinnaanngikkallarpara, Qeqertarsuulli Tunuani aalisartut maannamut naleqqiullugu piffissami sivisunerusumi aalisarsinnaanissaat qulakkeerniarlugu assigiinngitsunik isumaliutigisaqarpugut, Karl Lyberth oqarpoq.
Sinerissap avataani qaleraleqassuseq pitsaarpasippoq. Biologit tamatumunnga tunngatillugu isumalluarnerupput, taamaammat aamma aalisarnermut naalakkersuisup Baffinip kangerliumarngata sineriaanit ungasinnerusumi kalaallit qaleralittassaat katillugit 1.500 tonsinik ilaniarlugit pilersaarutigaa.
