Karl Lyberth kommunalbestyrelsemi ilaasortaajunnaarpoq
- Qeqqata kommunalbestyrelsianit tunuarninnut pingaarnertut patsisaavoq borgmester Malik Berthelsen tapersersorsinnaanagulu tatigisinnaajunnaarakku, Karl Lyberth tusagassiutinut taama allagaqarpoq.
Taassuma innersuussutigaa, ikioroornartumik hashimik Malik Berhelsen politikkimik suliaqalernissanik sioqqulugu tuniniaasarsimaneranik suliaq.
- Siullermik inuuninni kukkussutigisimasakk qanorluunniit nuanniitsigisimagaluarpata ajoraluartumik allanngortissinnaanngilakka, taamaattumik Karl Lyberthip ukiorpassuit matuma siorna pisut, uannut tatiginnikkunnaarnera allatut iliuuseqarfigisinnaanngilara, taamaallaat tusaatissatut tiguinnarsinnaavara, Malik Berthelsen oqarpoq.
Berthelsenip aqutsinera isornartorsiorneqarpoq.
Malik Berthelsenip Kommunimi qullersatut aqutsinerliunnera Karl Lyberthip aappaattut tunuarnerminut pissutaanerarpaa.
- Aqutsinerlunnerup kingunerisaanik ilaatigut kommunimi atorfilittani qullersat marluk, tassa kommunaldirektøri tullersortaalu, ataatsikkut soraarniuteqarput.
Inuit pineqartut taakkua ukiorpassuarni tunniusimallutik pikkorillutillu sullissilluarsimasut pisariaqanngitsumik ataatsikkut annaanissaat kommunimut sanngiillisaataasussaavoq akuerineqarsinnaanngitsorlu.
Malik Berthelsen tamanna pillugu oqarpoq, Qeqqata Kommuniata ingerlanneqarnera pillugu avataaniit nalilersuiffigineqarmat, siunnersuutigineqarsimasoq, Qeqqata Kommunalbestyrelseani ataatsimiititaliat arfiniliusut sisamanngortinneqarnissaat siunnersuutigineqartoq aamma kommunaldirektør tullersortaalu direktørimik ataatsiminik ilaneqassasut, taamallu sinnersuuteqarnermi Qeqqata Kommunalbestyrelseani Karl Lyberth kisimilluni akuerseqataanngilaq Malik Berthelsen oqarpoq.
Siumut nuna tamakkerlugu polikkia isumaqatiginngilaa
Nuna tamakkerlugu Siumumi politikikkut ingerlatsineq aamma akuerisinnaanagu Karl Lyberth Siumumit tunuarpoq
Siumup politikkitoqaa tunullugu illoqarfiit allat nunaqarfiillu puigorlugillusooq illoqarfiit anginerit sisamat kisimik annerusumik ineriartortinneqalersimapput. Isumaqarpungalu tamanna kukkunerusoq annertooq, Siumumit tunuartoq oqarpoq.
Efraim Olsen (S) Karl Lyberth taarserlugu kommunalbestyrelsemi ilaasortanngussaaq.