Karl Lyberth: Isumaqatigiinneq pingaarpoq

Taamannak allannguinissaq Inatsisartut upernaakkut ataatsimiinnissaannui aalisarnermut inatsimmik allannguinermut atatillugu ilanngunneqarsinnaasoq naalakkersuisuni siulittaasoq allaat isumaqarpoq.

Allaannguulli taamaattoq suliarineqarluaqqaartariaqartoq, Karl Lyberth oqarpoq.

- Attuumassuteqartut tamaasa ilaatinnissaat aammalu paaseqatigiinnissaat pingaartupilussuuvoq, Karl Lyberth oqarpoq.

Allannguisoqartinagu attuumassuteqartut, tassa KNAPK, GA Aalisarnermullu Siunnersuisoqatigiit isumasiorneqaqqaartariaqartut, Karl Lyberthip tikkuarpaa.

Pisassiissutilli sivisunerusumik atuutilernissaannut isumaqatigiissuteqartoqarsinnaanissaannut Karl Lybert isumalluarpoq.

- Isumaqarpunga periarfissat pitsaasupilussuusut, aamma naatsersuutigivara tamatta isumaqatigiissinnaassasugut, patsisigalugu sivisunerusumik akuersissummik aalisartut peqalerunik taava aalisartunut iluaqutaassaaq. Aalisartoq aamma siunissaq ungasinnerusoq eqqarsaatigalugu pilersaarusiorsinnaalissaaq taamaattumik naatsersuutigivara neriuutigalugulu tamatta tassuunga tunngatillugu isumaqatigiissinnaassalluta, Aalisarnermut naalakkersuisoq oqarpoq.

Aleqa Hammondip saqqummiussaatut ukiuni tallimani pisassiissuteqartoqalersinnaanesoq imaluunniit ukiuni pingasuni pisassiissuteqalertoqarsinnaanersoq Karl Lybertip suli isummerfigereerusunngilaa.

Aaqqissuussinerulli siunissami qaninnermi allanngortinneqarsinnaanera, Karl Lybertip neriuutigaa.

- Neriuutigivara 2015-imi, Jannuarip aallaqqaataaninngaanniit taanna atulersinnaassasoq, Karl Lyberth oqarpoq.