Karl Lyberth: Eqqumiiginanngilaq

Hans Enoksen Maniitsumi Siumup siulittaasuannut Karl Lyberthimut saaffiginnereernermi kingorna Maniitsumi efterskolissaq pillugu suliaq aallartinneqartoq, Karl Lyberth lokalradiokkut qineqqusaarnermi ilaatigut oqarpoq.

Maniitsumi Inuit Ataqatigiit sinnerlugit kommunalbestyrelsimut qineqqusaartoq Terkel Larsen tamanna pillugu ima oqarpoq:

- Inuit ataasiakkaat pinnagit kommunalbestyrelsi saaffigineqarsimasariaqaraluarpoq. Karl Lyberthi ilumoorsimappat taamaattoqarsimassaaq. Aamma eqqaamasariaqarpoq 2005-imi kommunalbestyrelsinut qinersisoqarmat Karl Lyberthi assingusumik iliuuseqarnikuusoq, tassa Hans Enoksenimit toqqagaalluni imaluunniit saaffigineqarluni oqaatigisarmagu, Terkel Larsen, Inuit Ataqatigiinneersoq oqarpoq.

Aaqqitassaasinnaasunik tikkuartuilluni parteeqatigiit iluminni oqaloqatigiittarnerat Karl Lyberthimit tupigineqanngilaq. Inuit Ataqatigiit, Atassut partiilluunnit allat sinnerlugit qinikkatut suligaanni taamaaliortoqartartoq Karl Lyberthip oqaatigaa:

- Eqqumigiinanngilaq, aamma kommunalbestyrelsi qulaatiinnarlugu iliornertut isiginngilara. Suliaq aallartereermat Atassummeersut Inuit Ataqatigiinneersullu ingerlaannaq attavigivagut oqarluta: Takuuk, naalakkersuisuninngaanniit ima saaffiginnissuteqartoqarpoq, assut soqutiginarpoq, Maniitsumut iluatinnarpoq, suleqatigiillutalu ikioqatigiillutalu tamanna piviusunngortitsigu. Taamaattumik kommunalbestyrelsi qulaatiinnarlugu suliaqarnermik taallugu isornartorsiuineq paasiuminaatsippara, Siumut sinnerlugu Maniitsup kommunalbestyrelsiani ilaasortaq Karl Lyberth oqarpoq.