Karl Lyberth: Ammassassuarnik immitsinnut pisassinnissatsinnut piareersimavunga
![](/sites/default/files/styles/image_934x467/public/article_images/karl_lyberth630_0_0_0.jpg?itok=glsz5rwy)
- Uppernarsineqarpat ammassassuit avaleraasartuullu imartatsinniilersut, taava pinngitsoorata tamakku iluaqutiginiartariaqarpagut. Taakkulu aalisarnissaannik EU-mit itigartitaassagaluarutta allatut ajornartumik nammineerlunga piareersimavunga pisassiinissannut.
Aalisarnermut Naalakkersuisoq, Karl Lyberth taama oqarpoq, Savalimmiormiut imartaminni ammassassuarnik namminneerlutik aalisagartassiigaluarneri EU-mit killilersugaalernerisa kingorna.
Ammassassuit Savalimmiut imartaanni amerlatsikkaluttuinnartut kingunerannik, Savalimmiormiut namminneerlutik pisassaminnik amerliliigaluarput. Tamannali EU-mi nunat ilaasortaasut akornannit ippassaq killilersugaalernissaa isumaqatigiissutigineqarluni.
- Taama killittoqarsimanera uggornarpoq, tassami neriuutigisimagaluarparput Savalimmiormiut EU-lu paaseqatigiillutik arlaannik iliuuseqarumaartut, kisianni tassa pillaanermik kinguneqarpoq, tamannalu uggornaqaaq, Karl Lyberth oqarpoq.
Tunup imartaa tamakkiusavilluni ammassassuarnik avaleraasartuunillu ullumikkut peqalersimavoq, tamatumalu kinguneranik Nunatsinni aalisartut misileraaallutik aalisarsinnaanissaminnut 45.000 tonsinik pisassinneqarluni. Misileraanerullu kingorna ammassassuarniarneq Nunatta inuussutissarsiutaannut ilaalissappat, isumaqatigiinniarneq pinngitsoorneqarsinnaanngitsoq Karl Lyberthip oqaatigaa.
- Soorlu Island, Savalimmiut, Norge aamma EU paaseqatigalugit tamakkuninnga aalisarnermik ingerlatsiniassaagut. Tassami Nunarput kisimiilluni tamakkuninnga aalisarnavianngilaq taamaattumik isumaqatigiinniarnissat avaqqunneqarsinnaanngillat.
Aalisarnermut Naalakkersuisoq, Karl Lyberth taama oqarpoq.