Karl-Kristian Krusep atlantikup avannaani aalisarnermut ministerit ataatsimeeqatigigai
Ataatsimeersuarneq Canadami Shediacimi sapaatit-akunneranni uani ingerlanneqarpoq pingaarnertullu sammineqartoq tassaavoq nunarsuarmi tamarmi imartat illersorneqarnissaat anguniarneqassasoq, Naalakkersuisut tusagassiorfinnut nalunaaruteqarlutik taama allapput.
Canadami aalisarnermut imartamullu ministerip Dominique LeBlancip aalisarnermut naalakkersuisunut suleqatiminut ilisimatitsissutigaa ataatsimeersuarnermi Shediacimi ingerlanneqartumi pilersaaruteqarluni angusaqarluarniarumalluni 2017 naatinnagu imartap 5 procentia illersorneqassasoq, aammalu 2020 nallertinnagu 10 procentit angussallugit.
Naalakkersuisup Karl Kristian Krusep imaani avatangiisit pillugit inatsit nutaaq Inatsisartuni 2017-imi maajip qaammataani akuersissutigineqartoq naalakkersuisutut suleqatiminut oqalugiaatimini paasissutissiissutigaa.
- Imartatsinni uumasut nerisaqaqatigiinnerini mingutsitsineq pinaversaartinneqassasoq, tassani qularnaarniarlugu mianersortumik - aammalu uumasoqatigiit ingerlarngat illersorlugu ingerlariaaseqarnissaq pillugu, kisianni aamma qularnaarniarlugu, inuiaqatigiit ineriartornerminni piujuaannartitsilluni ingerlariaaseq atorneqassasoq, tusagassiorfinnut nalunaarummi taama allassimavoq.
Aalajangiinerit immamik illersuinermi ersarissumik suleriaaseqarnikkut aalisarnermik suliallit, peqatigiiffiit nunallu inoqqaavi suleqatiginerisigut ingerlanneqarnissaat ataatsimeersuarnermi isumaqatigiissutigineqarpoq.
Naalakkersuisut aalisarneq pillugu inatsisissatut siunnersuutaat nutaaq pissutigalugu Karl Kristian Kruse Nunatsinni piffissami kingullermi oqallitsitsingaatsiarpoq.
