Karl-Kristian Kruse Siumumi siulittaasoorusunngitsoq
Karl-Kristian Kruse Siumup siulittaasuanik qinersinissamut sassanngilaq.
Tusagassiorfinnut nalunaarummi taama allappoq.
Karl-Kristian Kruse Siumup politikkikkut oqaaseqartartorivaa, partiimilu tassani siulittaasumik qinersinissamut sassarnissamik isumaliutiginnissimasut ilagaat. Sassarniarnanili aalajangerpoq.
- Misigivunga Siumiumi siulittaasuunissannut piareersimananga, Karl-Kristian Kruse tusagassiorfinnut allappoq.
Kim Kielsen Siumumi siulittaasuuginnarusulluni nalunaarnikuuvoq. Kisianni naalakkersuisuusimasumit, Erik Jensenimit aamma Inatsisartut siulittaasuannit, Vivian Motzfeldtimit unammillerneqarpoq.
AAMMA ATUARUK Siumup ataatsimeersuarnissaa kinguartinneqassasoq aamma qarasaasiatiguussanngitsoq
Karl-Kristian Krusellu Kim Kielsen taperserpaa:
- Siumup nuna tamakkerlugu ataatsimeersuarnissaanut siulittaasussamut sassartut pingasuusut akisussaaffimmut angisuumut imaannaanngissinnaasumullu sapiugatik sassarmata tikilluaqqungaarpakka.
- Tamaasali taasinnaanngilakka, taamaattumik qanorluunniit inississagaluarpata maannakkut siulittaasoq qineqqissavara, Karl-Kristian Kruse oqarpoq.
Siumumi siulittaasunngortussaq partii nuna tamakkerlugu piffissami aggersumi ataatsimeersuarpat pilersaarutit malillugit qinerneqassaaq.
Partiip nuna tamakkerlugu juulip ulluisa arfineq-pingajuanniit qulingata tungaanut ataatsimeersuarnissaralua Ilulissani septembarip ulluisa sisamaaniit arferngata tungaanut pisussanngortillugu kinguartinneqarpoq.