Karl Isaksen "Doro" toquvoq

Doro ilinniagartuujuvoq Eskimologi naammassisimallugu. Nuummi Qaqortumillu ilinniarnertuunngorniarfinni ukiuni arlalinni lektoriuvoq.

Ukiut arlallit matuma siornatigut qaratsamigut aanaartornermi kingorna siusinaarluni sulisinnaajunnaarpoq.

Doro peruttulernermini Kalaallit Nunaanni politikkikkut eqeersaanermut annertuumik peqataavoq, inuiaqatigiinni pissutsit nassuiaatigisarnerisigut, Carl Christian Olsen, Puju Dorup toquneranut atatillugu eqqaaniaalluni taamatut allappoq.

Doro Københavnimi ilinniarnertuutut atuarnermi nalaani inuusoqatini peqatigalugit Peqatigiit Kalaallit ukiortaarsiornerini qungujunnartunngorlugit aliikkusersuutit arlallit taalliamigut peqataaffigisarpai.

Dorop Karl Isaksenip isiginnaartitsissusiaraa Navaranaq aammalu atuakkiannguaqarpoq ateqartumik Angakkoq. Aviisi Kujataamiu aaqqissuisooqataaffigaa, tassanilu sulinermini Qaqortumi pissutsit aallaavigalugit aallaaserisaqartarluni, taaguuteqartumik Pisuttuartoq. Allaaserisai taakkua kingusinnerusukkut atuagaaranngorlugu saqqummersinneqarpoq.