Karl Frederik Danielsen Naalakkersuisunngortoq
Tamanna naalakkersuisut siulittaasuata, Kim Kielsenip Inatsisartuni sisamanngornermi ullup qeqqata kingorna nalunaarutigaa.
Karl Frederik Danielsenip Simon Simonsenip naalakkersuisuuffigisai, tassa ineqarneq attaveqaqatigiinnerlu, naalakkersuisuuffigilerpai.
Simon Simonsen Inatsisartuni ilaasortaaqqilerpoq.
Simonsen stressimik napparsimalluni oktobarip naalernerani suliunnaarpoq. Tassalu taassuma Naalakkersuisut maanna qimavippai.
Karl Frederik Danielsen ilinniartitsisut peqatigiiffianni IMAK-imi siornatigut siulittaasuuvoq.
Karl Frederik Danielsenimik naalakkersuisunngortitsinermut atatillugu upernaaq qinersinermiilli naalakkersuisut taarserarsimaqisut, partiiit arlallit uparuarpaat.
Tamatumunnga akilluni Kim Kielsen oqarpoq, Naalakkersuisunut ilaasortassamik qinersigaangatta, siunnerfik ataasiinnaasartoq, tassalu nukittuumik inissinnissaq. Kisianni nappaat ilmaaliallaannarluni takkussinnaasarpoq, Kielsen oqarpoq.
Aamma taasuma ilisimatitsissutigaa, Siverth K. Heilmannip Naalakkersuisuni ilaasortaaginnassanerluni maanna eqqarsaatigigaa. Heilmann pinngortitamut, avatangiisinut ilisimatusarnermullu naalakkersuisuuvoq.
