Karina Møller nunatsinniippoq

Nunatsinneersoq erinarsortartoq isiginnaartitsisartorlu, Alaskami ukiuni kingullerni aqqanilinni najugaqareersoq, Karina Møller, ulluni makkunani nunatsinniippoq, isiginnaartitsissusiami Ukaliatsiami Alaskamiusut qitinnermik ilitsersuisuujartorluni aammalu erinarsoqatigiinnik sungiusaajartorluni.

- Isiginnaartitsisartunik erinarsortartunillu sivisunerusumik nunatsinni suleqataalluni nuanneqaaq. Nalinginnaasumimmi nunatsinniikkaangama sivikutsuinnarmik naapittarsimavakka. Aamma malunnarpoq, nunatsinni kultoorikkut suliniarneq siuariarsimaqisoq, tassami Katuap pilersinneqarneraniilli siornatigumut sanilliullugu siuariarneq malunnarsimaqaaq. Tassami Katuami isiginnaartitsisarfissuaqarpoq, tassanilu aamma nipilersornermik tusarnaartitsisoqarsinnaalluni, Karina Møller oqarpoq nangillunilu:

- Alaskami qitittariaaseq ileqqorineqartoq kimittoorujussuuvoq, malunnarporlu isiginnaartitsisartut nunatsinneersut Alaskami qitittariaasiusunik pulallaqqinnerusut, aammami immaqa kulturii imminnut qaninnerugamik. Karina Møller oqarpoq nangillunilu:

- Aamma nunat allat qitittariaasiinut soorlu ballet-ertunut allanullu qitittariaatsinut naleqqiullugu, Alaskamiut qitittariaasiat kimeqarnerusutut isiginiarnartarpoq. Aammami qangarsuaaniilli pisarsimasut pillugit qitittariaasiugami, aammalu meeraaqqaniit utoqqarsuarnut qitittarneq ingerlanneqartarluni.

Qitikkaangamik nuannaarlutik qitittarput, malunnartarporlu nunatsinni tamanna amingaataasartoq, tassami Alaskami Inuit qitikkaangamik nuannaarnerujussuarmik pilersitsisarpoq. Taamaammat nunatsinniillunga taamatut suleqataanera nuannaarutigeqaara, Karina Møller, naggasiilluni taama oqarpoq.

Isiginnaartitsissusiaq Ukaliatsiaq, inuiattut ullorsiornitsinni juunip 21-ani takusassiarineqaqqaassaaq.