Karin Ladefoged: Pujortartarnerup kinguneri ullut tamaasa naapitassaapput

Ullumikkut pujortanngitsoornissat eqqaamaviuk? Tassami ullumikkut ulloq nunarsuaq tamakkerlugu pujortarfiunngilaq, inuillu taamatut peqqinnanngitsumik ileqquminnik unitsitsiniarnissaat pineqarpoq.

SLiCA-mik taallugu nunatsinni misissuinermi paasisat naapertorlugit nunatta inuisa 70 procentiisa missaat pujortartarput. Taamaalilluni misissuinermi paasineqarpoq kalaallit Canadamiut peqatigalugit issittuni nunalinni pujortarnerpaajusut.

Pujortartarnerup kinguneri Dronning Ingridip Napparsimmavissuani ullut tamaasa naammattoortaritik nakorsaatinik katsorsaavimmi nakorsaaneq Karin Ladefoged oqaluttuarpoq:

- Annerusumik puammikkut kræfteqalersimasut naammattoortarpavut. Puammikkut kræfteqartut ukiumut 30-t missaat kemortillugit katsorsartarpavut.

- Puammikkut kræfteqartut piffissaq sivisoorujussuaq atorlugu katsorsarniarneqartarput, nukinnik atuinartorujussuuvoq, ilungersunartumik katsorsaaneruvoq aamma nakorsaatinik atuinaannarani tarnikkut nukippassuarnik tigusisarpoq. Taamatullu nappaatillit ikiorneqarnissamik pisariaqartitsisorujussuusarput, Karin Ladefoged oqarpoq.

SLiCA-mik taallugu Issittumi misissuinermi paasisat naapertorlugit Qeqertarsuup Tunuani nunallit Nunatsinni pujortannginnerpaajusut atuarneqarsinnaavoq.

Tamaanimi najugallit 38 procentii pujortarneq ajorlutik oqaatigaat.