Qaanaami angajoqqaaqatigiit Karen Littauerimik politiinut unnerluutiginninnerat tapersersorniarlugu aammalu Karen Littauerip Qaanaamiinnermini immiussai oqalugiaqattaarnissaalu unitsinniarlugit, Nuummi innuttaasut ilaat Kristoffer Petersen II sinerissami atsiornernik katersilluni aallartippoq.
Kristoffer Petersen:
- Tunngavigaarput Karen Littauerip Danmarkimi oqalugiannginnerani kiisalu filmiliarisimasaminik takutitsinnginnerani unitsinneqartariaqartoq.
- Atsiortitsinerit amerlassusaat takoreerutsigu oqartussanut ingerlateqqissavarput - oqarluta Karen Littauerip suliaa unitsinneqartariaqartoq.
Kristoffer Petersen II oqarpoq oqartussat tassaasinnaasut politiit, imaluunniit eqqartuussivik aqqusaarneqarsinnaajumaartoq, atsiornerit amerlasusaat takoqqaariarlugu.
- Allaqqunneqarsinnaanngilaq, suliaq taanna innuttaasunut kanngunartuliaammat ingerlaqqissinnaasariaqarpugut peqatigiilluta.
Eqqartuussivilersuussisinnaanertik Kristoffer Petersen II-p ima tunngaveqartippaa:
- Tusagassiuutitigut saqqummiunneqareerpoq, meeqqat akuerineqaqqaaratik apersorlugit pissusilersorfigisimavaat, taamatut akuerineqaqqaaratik sulisimanerat akuerisinnaannginnatsigu.
Atsiornernik katersineq Nuummi aallaqqaammut ingerlanneqassasoq, internetilu atorlugu atsiornernik katersinissamut aaqqissuusseqatissarsiussalluni Kristoffer Petersen II oqarpoq.