Karen Amalie Triumf: allaanngilaq nissuma illuatungaa allamiittoq

- Allaanngilaq nissuma illuatungaa allamiittoq. Taama oqaluttuarpoq Karen Triumf, kalaallit allarpassuit assigalugit nunatta avataani najugaqartoq. Ukiut kingulliit 30-t Norgimi najugaqaraluarluni suli nunatsinnut sakkortuumik misigissuseqarpoq.

Karenip pania, Karen Amalie Triumf arnamisut ataasiinnarmik kinaassuseqanngilaq, marlunnilli kinaassuseqarluni.

- Imminut taarusuppunga affarmik kalaaliullunga affarmillu Sameullunga, tassa anaanaga kalaaliugami ataatagalu Sameulluni, taama oqarpoq 30-nik ukiulik Karen Amalie. Naak inuunini naallugu Norgimi najugaqaraluarluni Sametut misigisimanerunngilaq. Tassami tarrarsuummi imminut takugaangami kalaallimit akusaanerminik eqqaasinneqartuartarami. Karen Amalie kalaallisut oqalussinnaanngilaq, tamannali nammineq toqqagarinngilaa.

- Maanga nuukkatta mikisuararsuuvunga, anaanamalu Norgimiutut Samesulluuunniit oqaluuttarmanga pissusissamisuuginnarpoq. Ataatannit aanaga Norgimiutut paasisinnaanngimmat, taamaattumik Samesut oqaluuttarpugut.

Karen Amaliap nunatsinni najugaqarluni qanoq issanersoq siornatigut eqqarsaatigisarsimavaa, kisiannili isumaqarpoq; kalaallisut oqalussinnaanani ajornakusuussaqisoq.

Taamaattorli ukiut arfineq-marluk matuma siornagut ernertaaramili kalaallinik siuaasaqarnini aammattaaq eqqarsaatigisarpaa. Ernini oqaluttuuttarpaa anaanaminit aanaa kalaaliummat, iikkaminilu ernermi assinga qaqortumaartoq assiutigaa, annoraarlu Karen Amaliap atsaanit tunissutisiarisimavaa.

- Asseq taanna tanngassimaarutigisaqaa, Karen Amalie Triumf naggasiivoq.

Soorlu silaannaap allanngoriartornera nunatsinni malugisinnaagipput, aammattaaq Karen Amaliap Norgip avannaani tamanna malugisinnaanerarpaa. Oqaatigaa ukiuni kingullerni apinikinnerusalersoq.