Karakteerilersueriaaseq nutaaq ilinniarfiit atulerpaat
- 13 skalap 7 skala-llu assigiinngissutigaat nutaaq 7 skalamut killittussiaagami nutaannginnerlu 13-mut killittarluni, taamaalilluta ilinniartup piginnaasai suup nalaaniikannernersut paasilertorsinnaalerparput, imaanngitsoq ilinniartoq angusinersoq angusinnginnersorluunniit nalilertussaallutigu, tassa ilinniartoq ajunnginnersoq ajornersorluunniit nalilerlugu.
Assigiinngissutaalu aamma aana, nutaanngitsumi 13 pineqartoq maanna 12 pineqartalissammat, aammalu naqinneq A atorneqartussanngussalluni.
Tassa 13 skala atorallarmat 13-mut anngutissagaanni pitsaanerpaarpaamik angusaqarsimasariaqarpoq, sunnguamilluunniillu kukkuneqanngilluinnartariaqarluni. Nutaamilu aamma soorunami pitsaanerpaarpaamik angusaqarsimasariaqarpoq, kisiannili 13 skalatut ingasatsiginngilaq, tassami amigaateqalaartoqarsinnaaneq tassani akuerineqarpoq.
Tassalu imaappoq, pikkorilluinnarluni 13 angusimagaanni taava nunami allamiunut nallersuuttoqarsinnaalersarpoq, maannali imaalerpoq A angusimagaanni allamiunut nallersuuttoqarsinnaasoq, taamaattumik nutaaq taanna iluareqaarput, Nuummi Niuernermik ilinniarfiup pisortaa, Inger Graven Larsen, oqarpoq.
- 13 skalamik karakteerilersueriaaseq taamaallaat Danmarkimi Kalaallit Nunaannilu atugaavoq, nunarsuarmilu kisitta periuseq taanna atugaraarput. Nunani allani 5 trin skala atortarpaat imaluunniit 7 trin skala atortarlugu, imaluunniit soorlu Amerikamiut filmiini takusarivut A-B-C-D-F-t atortaraat. Maannalu tassa allamiunut nallersuussinnaalerpugut, tamannalu pitsaasuuvoq, tassami kalaallit ilinniartut nunanut allanut ilinniariartoraangamik, Kalaallit Nunaanni karakteerilersueriaaseq nassuiaruminaatsissinnaasarmassuk, massakkulli taakkununnga nassuiaanissaq ajornannginnerulerpoq, Inger Graven Larsen oqarpoq.
Karakteerilersueriaaseq nutaaq, suli meeqqat atuarfianni Ilinniarnertuunngorniarfinnilu atorneqalinngilaq, aappaaguli atorneqalernissaa ilimagineqarpoq.
