Karadzicimik eqqartuussineq aallartippoq

Karadzic 1990-ikkunni inunnik 10.000-ilikkuutaanik toqoraanernut, pinngitsaaliilluni arnerinernut allamiunillu kingoqqisunik nungusaasimasutut unnerluutigineqarpoq. Kisiannili taassuma eqqartuussivikkut suliassaq oqaluttuarisaanikkut isiginninnermut annertuumut akerliuniarnertut ammassallugu toqqarpaa.

Radovan Karadzicimik eqqartuussinissaq piareersaanerpassuit pereersullu aallartinneqarpoq. Taannalu aana issiavoq pingaartorsiorani unnerluussisumullu, pingaartumillu eqqartuussisumut inussiarnisaarluni. Meeqqat eqqarsartaasiannik immikkut ilisimasalik, taalliortoq Serbiamullu asannittoq, Radovan Karadzic. Atuffasinik isarualersimavoq, aallartillunilu:

Inuttut toqujasuunera illersorniarnagu maaniippunga, maaniillungali naalagaaffinnguup pissatseruttorfia illersorniarlugu, taama oqarpoq. Karadzicip toqujasup illersuisoqarnissani pisariaqartissinnaasimagaluarpaa. Unnerluussut annertuupilorujussuarmik pinerluttuliorsimanermik oqaasertaqarpoq, inuppassuarnik toqoraaneq, nungusaaniarluni sorsunneq, ukiut pingasut affarlu Europami illoqarfissuarmik Sarajevomik naakkittaaqisumik qaartartumeerisaqattaarnerit, 1995-imi Srebrenicami nukappiaqqanik angutinillu 8.000-it sinneqartunik imminnut illersorsinnaanngitsunik naakkittaaqisumik toqoraanissamik pilersaarusiorneq. Karadzicilli ataasinngornerup ullaavani maani Hollandimi nunarsuup oqaluttuarisaanera oqaluuseriumaneruaa. Naalagaaffeerannguaq pissaanerujussuarmik pigisaqartoq Bosnien-Hercegovina saqqummiuppaa, taamanikkut 1991-imi tassani serbiamiunut præsidentitut sassarami nammineq oqarneratut nunap innuttai tamaasa annaakkumavai. Islamimik upperisalinnit ingasattajaarniartunit annaakkumallugit, musliminillu nunamik taassumannga 100 procentimik nakkutilliinissaannit, kristumiut nunami amerlanerpaajusut, tassalu serbiamiut kroatiamiullu, musliminit namminneq nunaminni tikeraaginnartutut isigisat ikilisarneqarneranni.

Tassaana, Radovan Karadzic oqarpoq, taakkua pilersaarutaasa taamaaliulersikkaatigut.