Karadzic marsimi eqqartuunneqassaaq

Jugoslaviaasimasumi nunat tamalaat eqqartuussivianni eqqartuussisut ullumi taamatut aalajangiipput, eqqartuussinerlu unnerluussaasumit najuuffigineqanngikkaluaruniluunniit ingerlanneqarsinnaanngussalluni.

Karadzic-ip qaammatit qulit atorlugit imminut illersornissani piareersarumavaa, taamaaliorsinnaanngikkunilu eqqartuussivimmut ornigukkumanani. Tamannali itigartinneqarpoq, pinngitsaalillugumi illersuisoqartussanngortinneqarpoq, tassa nammineq ikiuussinnaavoq, aammali piumanngikkaluaruniluunniit pinngitsoorani eqqartussaassalluni. Tassa marsip aallaqqaataani Haag-imi eqqartuussaanissaa aallartissaaq, piumagunilu Schevening-ip parnaarussiviani, Haag-ip ungasinngisaaniittumi uninngaannarsinnaassalluni.

Siornatigut eqqartuussaasimasumut Slobodan Milosjevic-imut suliaqarnermi ilikkarsimasat aalajangiinermut tunngavilersuutigineqarput, taannami imminut kisimi illersorsimavoq, kingunerisaanillu ukiuni sisamani eqqartuussivimmi pilikatsitsilaavissimalluni. Ilami suliassaq annertusimaqaaq, Milosjevic-illu saniatigut nerisarlunnini pujortarnerujussuanilu pissutaallutik peqqiilliulersimavoq eqqartuussaanissaralualu kinguartinneqartarsimalluni. Naggataatigullumi Milosjevic toquvoq, eqqartuussaaneratalu ingerlarnga tamanit naammagineqarsimanani.

Karadzic-ip assingusumik iliuuseqarluni aallartissimanera, tassa sapaatit akunnerani kingullermi eqqartuussivimmut ornigukkumannginnera maanna aporfissaajunnaarpoq.

Marsimimi eqqartuussaaleruni paamaartitsiniaraluaruni maannakkut itigartussanngoreerpoq.

Radovan Karadzic inuiannik nungusaasimasutut, Bosniamilu 90-ikkunni sorsuunnermi allanik pinerluuteqarsimasutut unnerluunneqarpoq.