Karadzic imminut illersorniarpoq

Tamanna tunngavigalugu unnerluussissutit atuaqqissaarnissaannut piffissaqarumalluni eqqartuussinerup aallartinnissaa aggustip 29-anut kinguarteqqummagu akuerineqarpoq.

Inuiaqatigiinnik toqoraasimasutut aammalu inoqatigiissutsimut pinerluuteqarsimasutut unnerluutigineqarnini ullumi sassartinneqarnermini oqaaseqarfigiumanngikkallarpai.

Inatsisilerituumik siunnersorteqarumannginnerluni eqqartuussisup aperimmani Karadzic akivoq – aap, ersinngitsumik siunnersorteqarpunga imminulli illersorniarlunga.

Karadzic ilanngullugu oqarpoq unnerluussisut unnerluussissutitik allanngortiterlugit piareersaalersimasut, sulili taakku takusimanagit.

Aamma oqarpoq tigusarineqarnermi ullua kukkusoq eqqartuussisunit nalunaarutigineqarsimasoq, eqqartuussivimmullu tunniunneqarnini unioqqutitsinermik tunngaveqarsimasoq.

Karadzic ukiut qulit sinnerlugit ujaarineqareerluni Beograd-imi pingasunngornermi ullaassanngoriartortoq tigusarineqarpoq.

Karadzic aamma oqarpoq amerikamiut isumaqatigiissitsiniartuata 1996-imili neriorsorsimagaani naalakkersuinermiit tunuaruni FN-imi sorsunnermi pinerluuteqarsimasut eqqartuussiviannut tunniunneqassanngitsoq.

Karadzic ilaatigut musliminik angutinik nukappiaqqanillu 8.000-inik Srebrenicami toqoraatitsisimasutut unnerluutigineqarpoq.