Karadzic Haagiliaappaat

Siornatigut Serbiami siuttuusimasoq Radovan Karadzic Serbiami illoqarfiit pingaarnersaannit Beogradimit Haagimi sorsunnerup nalaani pinerluuteqarsimasunut eqqartuussivimmut unnuaq timmisartuunneqarpoq.
Allattoq Elisa Isaksen
juulip 30-at 2008 06:28

Timmisartoq Karadzic ilaasoralugu ullaaq Hollandimi Rotterdamimut mippoq. Qulimiguullit arlallit politiillu bilerpassui mittarfimmiipput, tassa Karadzicip Naalagaaffiit Peqatigiit parnaarussiviannut Haagip qanittuaniittumut ingerlatinneqarnissaanut isumaginnittussat.

Jugoslaviaasimasumi sorsunnermi pinerluuteqarsimasunut eqqartuussivik Naalagaaffiit Peqatigiit Isumannaallisaaniaqatigiivisa 1993-imi pilersippaat, taamaaliluni inuit Balkanimi 90-ikkunni sorsunnermi pinerluuteqarsimasut eqqartuussivitsigut malersorneqarsinnaaniassamata.

Karadzic sorsunnermi pinerluuteqarsimasutut inuiannillu nungusaasimasutut unnerluutigineqarpoq. Qaammatit arlallit qaangiuppata eqqartuussineq aatsaat aallartinneqarsinnaassaaq aamma ukiut arlallit qaangiuppata aatsaat pineqaatissiisoqarsinnaassaaq.

Karadzic ukiuni aqqanilinni ujaarineqareerluni sapaatip akunnerata siuliani Beogradimi allatut atilerluni toqqoqqasoq nassaarineqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq