Kaptajn Haddock Tyrkiami pujortaqqusaanngilaq

Tyrkiami TV-qarfiit ilaat 180.000 koruuninik akiliisussanngortitaavoq, titartakkanik filmiliap Tin-Tinip takutinneqarnerani Kaptajn Haddock pujortaatitortoq takuneqarsinnaammat.
februaarip 18-at 2010 05:51

Pujortartarneq pillugu inatsisit Tyrkiami sakkortoorujussuummata, filmini assigisaannilu cigaretsinik allanilluunniit pujortartoqaraangat TV-qarfinnit ersernerluttunngortinneqartarput. Titartakkanik filmiliani inuttaatinneqartut, Lucky Luke, Rasmus Klumpimi inuttaasoq Skæg aamma Kaptajn Haddock nammineq filmini qangali pujortartarunnaarnikuupput.

Tin Tinimilli filmiliami qanganitsami tamanna pinngitsoorsimavoq, Tyrkiamilu TV-qarfik TV8 maanna tassa aningaasivissortariaqalerpoq. Danmarkip Radioanit tamanna tusarliunneqarpoq.

Akiliisitaanissaq TV-mi aallakaatitassanik aalajangiisartunit naalakkiutaavoq. Aalajangiisartunut ilaasortat ilaat isumaqarpoq, piviusut piviusuusaartitallu meeqqat immikkoortilluarsinnaagaat. Taannali ilaasortanit allanit taperserneqanngilaq.

Nunat pujortarfiunerpaasut allattorsimaffianni Tyrkia nr. 10-jusoq oqaluttuamut aamma ilaagujoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq