2002-miit, taamanikkut Namminersornerullutik oqartussat kapisilinniarneq pillugu nalunaarutaat naapertorlugu, kapisillit tunisassiorfinni tunisassiarineqarsinnaajunaarput.
Atlantikup avannaani kapisillit piujuaannartinneqarnissaannut suleqatigiiffiup, naalisarlugu NASCO-mik taaguuteqartinneqartup, kapisiliniarnerup killilersorneqarnissaannik isumaqatigiiissutaannut tamanna naappertuuppoq.
Tamanna ima isumaqarpoq, kapisillit tunisassiorfinni tunisassiarineqarsinnaangillat, taamaallaat kalaalimineerniarfinni, ilinniartut najugaqarfiini, napparsimmavinni, taakkualu assigisaanni, neriniartarfinnilu tuniniarneqarsinnaallutik.
- Kalaallit Nunaata imartaani kapisileqassuseq ajoraluartumik ullumikkut suli pitsaavallaangilaq. Taamaammat biologit kapisillit pillugit inassuteqaataat suli isumalluarnanngillat.
Tamanna pissutaalluni Aalisarnermut, Piniarnermut Nunalerinermullu Aqutsisoqarfimmiit tigussaasumik suli eqqoriarneqarsinnaangilaq kapisillit Kalaallit Nunaata imartaaneersut qaqugu tunisassiassatut aalisarneqarsinnaalissanersut, Aalisarnermut, Piniarnermut, Nunalerinermullu Aqutsisoqarfimmiit Radioaviisimut ullumi taama ilisimatitsipput.
Akuersissummik pissarsisimasut aqagu aggustip ulluisa aallaqqaataanniit oktobarip ulluisa 31-at ilanngullugu kapisilinniarsinnaanerat ammaanneqartussaavoq. Pisarineqartut nammineq pissatut, taavalu kalaalimineerniarfinni neriniartarfinnilu tuniniarneqarsinnaassapput.