Kapisillit nunatsinnukartartut ikilisut
Taamaattumik Tuluit kapisilinniartartut kattuffiat Atlantic Salmon Trust - AST - tamanna paasiniarlugu misissuilluni aallartippoq. Kapisillit Nunatta Kitaata sineriaani pisarineqartartut sananeqaataanut ilisarnaatitut takussutissanik, tassa DNA-nik misissueqqissarnikkut tamanna pissaaq, Irlandimiut aviisianni Irish Times-imi ullumi taama allaaserinnittoqarpoq.
Kapisileqatigiit ataasiakkaat immikkoortissinnaanissaat matumani siunertarineqarpoq, taamaalilluni pisassanik aalajangersaanermi kapisileqatigiit ataasiakkaat isiginiarneqarsinnaaniassammata.
Kapisillit Nunatta sineriaaniittartut taamaallaat 10 procentii Europami kuussuarneersuunissaat AST-p ilimagaa, sinnerilu Amerikami Avannarlermeersuunissaat naatsorsuutigineqarluni.
Aningaasarsiutigalugu kapisilinniaqqusaajunnaarnerup ukiunik pingasunik sivitsorneqaqqinnissaa Naalakkersuisut aalajangiutereerpaat, tamannalu Tuluit kapisilinniartartut kattuffiata AST-ip aamma Amerikamiut kattuffiata taamaattup NASCOp nuannaarutigeqaat.
