Kapisillit 20 tonsit Norgemi qimaapput

Norgemi kapisilinnut tukertitsiviutigalutik uumatitsivimmiit kapisillit 20 tonsersuit kuugussaasoortut Sundemi aalitsallugit aallartippaat. Kapisillit uumatitsivinneersut nunatsinnut apuunnissamut nukissaqarnavianngitsut Pinngortitaleriffimmi biologi Helle Siegstad oqarpoq.
Allattoq Najaaraq Egede
juulip 07-at 2010 12:58

Kapisilippassuit 20 tonsinik oqimaassusillit, 9352-iusut agguaqatigiissillugu immikkut 5,5 kilomik oqimaassusillit, Norgemi uumatitsivissuarmit qimaasimapput, kangerlummullu kuugussaallutik. Tamanna pivoq ruujorersuaq suliarineqartoq ajutoormat. Tappava Sundemi Sunnhordlandimiittumi piumasut tamarmik aalitsapput, Norgemi aalisarnermut pisortaqarfik taama nalunaarpoq.

Nutaamik ruujorersualiornermi ajutoornikkut kapisilippassuit ungalugaasaniittut kangerlummut kuugussaasimasut tukertitsivimmi sulisut qallorniarsarigaluarpaat. Kisianni oqartussat peqqusipput kikkulluunniit kangerluttami qanorsuaq qissattarsinnaasut.

Nunatsinni kapisillit nassaassaasut USA-mit, Tuluit Nunaannit, Irlandimit, Canadamit, Norgemit aamma Kalaallit Nunaanneersuupput, nunatsinneersut tassaallutik Nuup Kangerluani Kapisilinneersut.

- Ilimananngilarli kapisilippassuit Norgemit nunatsinnukarsinnaanissaat, tassami uumatitsivissuarni alliartortitat pinngortitamiittuninngarnit nukeqannginnerusarput, Helle Siegstad Pinngortitaleriffimmi aalisakkanut immikkoortortami pisortaq biologi oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq