Assi: Julia Manzerova/Flickr Creative Commons

Kapisilittassat siorna 33 procentinik sipporneqartut

Kapisilinnik siorna pisat qanoq amerlatiginersut nalunaarutigineqartut nalunaarsorneqarnerisa kukkuluttorfigineqarnerat pissutigalugu aatsaat eqqoqqissaartumik paasineqarsinnaanngorpoq. Pisassiissutigineqartullu sipporneqangaatsiarput.

Kapisilittassat 30 tonsiupput, aalisarsinnaanermulli akuersissutinik nakkutilliisoqarfiup (KANUAANA-p) kisitsisaatai nutaat naapertorlugit 2018-imi kapisilinnik pisat 40 tonsit sinnerpaat. 

Pisassiissutigineqartut 33 procentinik sipporlugit.

Pisassiissutillu tamakkerneqarmata aalisarnermik unitsitsisoqannginnera nalunaarutigineqartut kukkuneqarsimanerannik pissuteqarpoq, KNAPK taama isumaqarpoq.

- Nalunaarsuinerit kukkuneqarnerat pissutigalugu pisassiissutigineqartunik sippuisoqarnera ajuusaarnarpoq. Tamanna aalisartunut ukioq manna kinguneqarsinnaavoq, KNAPK-mi pisortaq, Tønnes Berthelsen, oqarpoq.

Nunatta NASCO-mut siorna isumaqatigiissutigisaa naapertorlugu kapisillit ukiuni pingasuni ukiumut 30 tonsit nunatsinni pisarineqarsinnaapput. Pisat avammut nioqqutigineqaqqusaanngillat nunatsinniinnarlu atugassaallutik.

Isumaqatigiissummi aamma allassimavoq ukiumi ataatsimi pisassiissutit sipporneqarpata, taakku ukiup tullianut pisassiissutinit ilanngaatigineqassasut.

Naalakkersuisullu isumaqatigiissut ataqqissagunikku, ukioq mannamut kapisilittassat 30 tonsiusut 20 tonsinut ikilisariaqassavaat.

2016-imi aamma taama pisoqarpoq. Ukiummi siuliani 12 tonsinik sippuisoqarpoq, tamannalu ukiup tulliani pisassiissutit 45 tonsiusut 32 tonsinut ikilineqarnerannik kinguneqarpoq. 

Namminersorlutik Oqartussat marsip aallaqqaataani paasissutissiissutigaat kapisilinniarnermut akuersissutilinnit 790-iusunit 585-it pisaminnik nalunaaruteqarsimanngitsut, taamaaliunngippatalu akuersissutaat nutarterneqarsinnaanngitsut. Nalunaarsuinermili kukkusoqarsimavoq. Siornalu aatsaat taama amerlatigut nalunaaruteqarsimasut, Tønnes Berthelsenip erseqqissaatigaa.

- Nalunaaruteqarnerit piffissami taama sivikitsigisumi taama pitsanngoriarsimatiginerat tulluusimaarutigisupilussuuarput, pisortaq oqarpoq. 

Sunngiffimmi pinialuttartut nalunaaruteqartussaanerat 2018-imi aatsaat atulersinneqarpoq. KNAPK-lu tamatumunnga atatillugu paasinititsiniaavoq, sinerissami inoqarfiit ilarpassui tikinneqarlutik, paasititsiniaanerlu ukioq manna ingerlateqqinneqassaaq. 

Aalisarsinnaanermut Akuersissutinik Nakkutilliisoqarfiup ullumikkut paasissutissiissutigaa akuersissutillit 80-it missaanniittut nalunaaruteqarnissaat taamaallaat amigaatigineqartoq. Inuussutissarsiutigalugu aalisartut kapisilinniarnermut akuersissutillit 2018-imi nalunaaruteqartut ukiup siuliamut naleqqiullugit pingasoriaammik amerlanerupput.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat