Kapisilinniarneq ippassaq matuvoq
Ippassaq oktobarip 31-ani nal.00.00 Kalaallit Nunaani akuerisaasumik kapisilinniarsinnaatitaaneq unitsinneqarpoq.
- Qassutit tamarmik maanna qaqinneqareersimassapput, taama Aalisarnermut, Piniarnermut Nunalerinermullu Naalakkersuisoqarfimmi Immikkoortortaqarfimmi pisortaq Emanuel Rosing ilisimatitsivoq.
Nunatsinni sunngiffimminni aamma inuussutissarsiutigalugu kapisilinniartartut pisarisimasatik Kalaallit Nunaanni Aalisarsinnaanermut Akuersissutinik Nakkutilliisoqarfimmut nalunaarutigisartussaavaat.
- Inuussutissarsiutigalugu aalisarnermut tunngatillugu ullormut kapisilittat nalunaarutigineqartassapput, sunngiffimmili kapisilittat kingusinnerpaamik pisarineriniit aqaguani nalunaarutigineqassapput, taama Emanuel Rosing ilisimatitsivoq.
Nittartagaq nanoq.gl aqqutigalugu nalunaaruteqarnermut immersuiffissaq pissarsiarisinnaavat imaluunniit kommuninnut saaffiginninnikkut pissarsiarisinnaavat.