Kapisilinniarneq aggustip aallaqqaataani aallartissaaq

Kapisillit siaasakkat, kapisillit pujuukkat, allallu kapisilinnit mamartuliarineqarsinnaasut aggustip aallaqqaataaniit nunatsinni mamarsaatigineqalersinnaassaaput. Namminersornerullutik Oqartussat aalisarnermut pisortaqarfiannit nalunaarput, KNAPK-mik isumaqatigiiissuteqarluni kapisilliniarneq aggustusip aallaqqaataani aallartissasoq. Pisarnertut nammineq atugassanik kapisilinniartoqarsinnaavoq akuersissummik peqqanngikkaluarluni, kisianni tuniniagassanik kapisilinniarniaraanni tassa akuersissummik peqqaarluni kapisilinniartoqarsinnaassaaq. Namminersornerullutiik Oqartussat kapisilinniarnermut nalunaarutaat suli atuutsinneqarpoq taamaalillunilu pisanik nalunaarsuineq taakku naapertorluguit ingerlanneqassallutik.

Fabrikkinut nunanullu allanut tuniniaaneq inerteqqutigineqarpoq, tammanalu patsiseqarpoq naalakkersuisut Atlantikup Avannarpasissuani Kapisillit piujuaannarnissaannut suliniaqatigiiffimmut isumaqatiginninniarsimanerat. Taamaaliornikkut suliniaqatigiiffiup aningaasaateqarfianit kalaallit aalisartui taperneqarsinnaapput.