KANUNUPE: Nunaqarfiit qanoq mikitigisut sullinneqassanersut oqallisigitigu
Nunaqarfiit 100-inik inukinnerit matunissaannik, Demokraatineersup Palle Christiansen-ip oqallissaarutaa, KANUNUPE-p siulittaasuata, Siumumeersup Jens Kristian Therkelsen-ip, isumaqatiginngilaa, taamaattorli nunaqarfiit inukinnerit sullinneqarneqarnerat oqalliseqataaffigerusullugu. Kisianni nunaqarfinniit illoqarfinnut nutsertoqalissappat, ajornartorsiutaasinnaasut takorloorsinnaareerpai.
- Nunaqarfimmiut ilinniarsimanngitsut amerlasoorujussuupput, illoqarfinnullu nuussagaluarunik ineqarniarnikkut, suliffissaqarniarnikkut allatigullu ajornerusumik atugaqalissapput, Jens Kristian Therkelsen oqarpoq.
Illoqarfinni meeqqeriveqarnikkut atuarfeqarnikkullu periarfissaginnerummat, nunaqarfimmiut kinguaavi ilinniarnissamut periarfissaqarnerulissanngillat?
- Nunaqarfinni inuusuttut ilinniartartut amerliartorput, nunaqarfinniillu nuuttartut taamaalillutik ataavartumik amerliartorput, nunaqarfimmiut siulittaasuat oqarpoq.
Nunaqarfiit ilaat allaat pingasuinnarnik inoqarput, pisortanit sullinneqarlutik. Taavami nunaqarfiit qanoq mikitigileraangata kiffartuussineq unitsinneqartasava?
- Massakkut imaaliinnarlunga oqarusunngilanga, nunaqarfik ima inukitsigilerpat, arlaatigut sullinneqarnera unittariaqartoq. Nunaqarfiit aamma inukittunnguit ilaasortarigatsigut, taakkua illertussaavagut. Oqaloqatigiinnissamut ammajuarpugut. Nunaqarfik pingasuinnarnik inoqarpat, iliuuseqarsinnaaneq avaqqukkuminaassaaq, KANUNUPE-p siulittaasua Jens Kristian Therkelsen oqarpoq.
