KANUNUPE: Nunaqarfiit periarfississigit

- Soorunami aallartitsissagaanni aningaasaq pisariaqartinneqartarpoq. Taavali aallartitaq pitsaasumik ingerlappat, qularutissaanngilaq aningaasat tapiissutigineqartut piffissap ingerlanerani uterumaarput, immaqa allaat iluanaarutinngorlutik. Nunaqarfiit peqatigiiffiata KANUNUPE-p siulittaasua Jens Kristian Therkelsen taama oqarpoq.

Nunarput namminersulissappat, inuit nunaqarfinnit illoqarfinnut annerusunut nutsertariaqartut, GA-p aningaasarsiorneq pillugu nalunaarusiaani kingullermi inerniliunneqarpoq.

Kisianni tassa Nunaqarfiit Nunatta Karsianut aningaasalersueqataasinnaasut Jens Therkelsen oqarpoq, eqqaasitsissutigalugulu suliffiit mikinerusut nunaqarfinni ukiuni kingullerni pilersiortorneqarsimasut. Qaleralinnik tunisassiortut Rodebay Fish aamma Qeqertaq Fish aammalu Kangaamiuni Ukkusissanili takornariartitsinermik ingerlatsisut assersuutissaalluarput.

Nunaqarfimmiulli aallartitsisut ikipput, taamaammallu sukataarnerunnissaat pisariaqartoq Jens Kristian Therkelsen isumaqarpoq.

- Suli pimoorussinerulluta suliffiit aallartisarnissaannut aqqutissiuinissatsinnut pisussaavugut, nunaqarfimmiut siulittaasuat oqarpoq.

Aallarnisaasimasut misilittakkaminnik tunniussuinissaat tamatumunnga aqqutissaalluarpoq.

- Nammineerlutik pilersitsisimasut nunaqarfinnut allanut ilitsersuinissaat qularnanngitsumik iluaqutaassagaluarpoq, Jens Kristian Therkelsen oqarpoq.