Kanunupe: Aningaasarsiat amerlippata soqutigilissavaat
- Soorunami nunaqarfimmiut aamma ulluinnarni toqqissisimasumik inuunissartik pisariaqartippaat.
Nunaqarfiit ataatsimut isigalugit soorunami toqqissisimaffioqaat, kisiannili aamma ilaatigut pisoqariataarsinnaasarpoq kommunefogedimik pisariaqartitsinermik kinguneqartumik.
Taamaattumik ataatsimut isigalugit nunaqarfiit tamarmik kommunefogedimik pisariaqarnissaat pisariaqartinneqarpoq, aammalu neriuppunga uani akisaatinik qaffaanermi tamanna anguneqarsinnaassasoq, Kanunupep siulittaasua Jens Kristian Therkelsen oqarpoq.
Kommunefogedit ajoqitut ilinniarsimanngitsutut ukioq manna juulip aallaqqaataanit aningaasarsiaqalissasut, Danmarkip inatsisinut atortitsinermut ministeriata Morten Bødskovip sapaatip-akunneri pingasut matuma siornatigut nalunaarutigaa.
Ukiumut aningaasarsiassat 75.000-it koruuniussapput, nalunaaquttallu akunneri suliffiusimasut aamma aningaasarsiaqaataassallutik.
Taakkulu 7300 koruuniniit 50.000-it koruuninut maannakkut pisartagaannut naleqqiullugit amerlanerungaatsiarput.
Kommunefogeditullu sulinissaminnut piukkoortut amerlanerulissasut, Jens Kristian Therkelsenip neriuutigaa.
Nunatsinni nunaqarfiit pingajorarterutaat sinnerlugit maannamut suli kommunefogedeqanngillat, kisianni Nunatsinni politiit nunaqarfinnut kommunefogedilinnut 35-nut kommunefogedinullu ikiortilinnut pikkorissartitseqqammerput, taamatullu pikkorissartitsisarnerit pingaaruteqartutut Kanunupemit nalilerneqarpoq:
- Isumaqarpunga pingaaruteqartorujussuusoq, tassami ulluinnarni immersorneqarnissaminnut pisariaqartitsisartut malunnarsisimavoq, aamma pikkorissareernerup kingorna atortussaminnik annertuumik immersorneqarsimallutik maanga nunaqarfimminnut utertut ilaat kommunefogedit naapinnikuuakka, taamaammat ataatsimut isigalugu isumaqarpunga annertuumik pisariaqartissimagaat taamatut pikkorissarneqartarnissartik, Jens Kristian Therkelsen oqarpoq.