Kanukoka: Pallep oqaatigisai eqqunngillat
2011-mut aningaasanut inatsisissatut siunnersuummi Nunatsinni kommunit katillugit 8 million koruuninik ileqqaaruteqarnissaannik Naalakkersuisut pilersaaruteqarnerat borgmesteriniit assuarineqarpoq.
Aningaasaqarnermut naalakkersuisoq Palle Christiansen ullaaq radioaviisimut oqarpoq, kommuunit sisamaasut aningaasanik katillugit 8 million koruuninik ileqqaaruteqarnissartik akuersaarsimagaat.
Tamannali eqqunngitsoq Kanukokamit oqaatigineqarpoq.
- Kommuninut ataatsimoortumik tapiissutit suli 8 million koruuninik ikililerneqaqqinnissaat pillugu kommuninik oqaloqateqarsimanermik aningaasaqarnermut naalakkersuisup Palle Christiansenip, 2011-imi aningaasanut inatsisissamik tusarliussinermini, oqaasii ilumuunngillat. Aamma kommunit tamatumunnga akuersaarlutik oqaaseqarsimanngillat, Enok Sandgreen oqarpoq.
