KANUKOKA naalakkersuisut siulittaasuannut piumasaqarpoq
Napparsimasut paaqqutarisariallit napparsimavimmiitinneqartarnerini akinik qaffaaneq KANUKOKA-mit naammagineqarnani, akinik qaffaasimaneq isumaqatigiinniutigineqartariaqartoq Peqqissutsimut Naalakkersuisoq saaffiginniffigineqaraluarmat, taamatut piumasaqarneq naalakkersuisumit itigartinneqarpoq. Taamaannalu KANUKOKA-mi siulittaasup Lars Karl Jensen-ip naammaginagu Naalakkersuisuni sulittaasoq Hans Enoksen allaffigaa.
- Naalakkersuisumut allagaqarnitsinni neriuutigaarput Hans Enoksen-ip Peqqissutsimut Naalakkersuisoq peqqussagaa, KANUKOKA isumaqatigiinniarfigineqartariaqartoq.
- Peqqissutsimut naalakkersuisup allagai akuererusunnatigu KANUKOKA-minngaanniit ersarissarusupparput. Tassami Landstingsforordning normu 11, 30. oktober 1998-meersumi allaqqasoqarpoq akilersuutinut tunngasut allanngortinneqassappata, KANUKOKA inatsisartullu peqatigiillutik isumaqatigiinniarneq ingerlatissagaat, Lars Karl Jensen oqarpoq nangillunilu:
- Allakkatta akuerineqannginnerat pillugu Hans Enoksen-imut saaffiginnippugut. Nunatsinni politikkikkut allannguiniarnermi suleqataavugut soorlu kommunit aaqqissuuteqqinnissaat eqqarsaatigalugu. Assersuutigiinnarlugu ilinniartitaanermut tunngatillugu bloktilskudininngaanniit ukiuni kingullerni pingasuni aningaasarpassuarnik ilanngartuiffigineqarsimavugut, maannakkullu aamma napparsimavinni paaqqutariallit pillugit akit qaffanneqarlutik. Allaat 300 procentit ilaatigut angullugit kommunit ilaannut qaffannerussalluni. Taamatullu tuttussanik suliaqartoqarnera akuersaarsinnaanngilarput.
Taama oqarpoq KANUKOKA-mi siulittaasoq Lars Karl Jensen.
Lars Karl Jensen aamma isumaqarpoq isumaqatigiinniarsinnaanermik piumasaqarnermi Peqqissutsimut Naalakkersuisup itigartitsisimanera pingaakujunniarnerusoq.
