KANUKOKA-mi siulersuisut nutaat
Maannakkutut isikkoqartillugu borgmesterillu namminneerlutik kissaatigippassuk, taava tassa KANUKOKA-p siulersuisuini ilaasortanngorsinnaapput.
Apeqqutaaginnarporli alaatsinaattutut taasisinnaatitaanatik ilaasortaasinnaanersut, imaluunniit siulersuisuni tamakkiisumik ilaasortaassanersut.
Taamatuttaaq apeqqutit ilagaat siulersuisut tallimanik qulingiluanilluunniit ilaasortaqassanersut imaluunniit borgmesterit sisamaasut kisimik siulersuisuni ilaasortaasassanersut, borgmesterilli sisamaallutik ilaasortaasarnissaannik aalajangernissaq ilimagineqanngilaq.
Oqaluuserisassani pingaaruteqartunut ilaavortaaq, siulersuisuni siulittaasunngortussaq piffissaq naallugu sulisassanersoq imaluunniit piffissap ilaannaani sulisinneqartassanersoq.
Siunnersuutigineqarporli siulersuisunngortussaq piffissap ilaannaani sulisassasoq, Nuummilu najugaqartariaqarani, naak ullumikkut malittarisassani allassimagaluartoq siulersuisunngortussaq Nuummi najugaqassasoq.
Maleruagassat akuerineqassappata, periarfissat allarluinnaat ammaanneqassapput, taamalu imaaratarsinnaalluni borgmesterinngortussat sisamaasut arlaat siulersuisuni ilaasortanngorsinnaassasoq taamalu KANUKOKA-mi siulittaasunngorsinnaassalluni.
Siulittaasussatullu piukkunneqartut atit nutaat aamma taannarineqarput, ilaatigut Narsamiit Kiista P Isaksen aammalu maannakkut siulittaasumut tulliusoq Karl Lyberth qinigassanngortissinnaasutut piukkunneqarpoq.
Ataaserli qularnanngilaq, tassa siulersuisuni siulittaasussap Siumuminngaanneersuunissaa, tassami Ilulissani ataatsimiittut akornanni taasisinnaasut 20-iusut akornanni qulit Siumumik tunuliaquteqarput, taamalu tupigusuutigineqarsinnaassaaq siulittaasunngortussaq partiimit allameersuussappat.