Akiliisitsiniarnermi suliassat qitiusumit ingerlanneqalernissaannik inatsisissatut siunnersuut, kommuninut tusarniaassuutigineqareersimasoq, KANUKOKA-mit isumaqatigineqanngilaq.
KANUKOKA-p siulittaasua Søren Alaufesen KNR Avannaani suleqatitsinnut Janus Maqe-mut ima oqarpoq:
- Akiliisitsiniartarneq qitiusumit ingerlanneqalissappat marloqiusamik allaffissortoqalissaaq, aamma tusarniaanermut tunngatillugu akissutitsinni tamanna erseqqissaassutigereerparput, inuillu sullinneqarnerat kigaannerusutut isikkoqalissaaq, Søren Alaufesen oqarpoq.
Aalajangiisoqannginnerani Inatsisartut eqqarsarluaqquneqarput:
- Neriuppunga itigartitsissutigissagaat, KANUKOKA-p siulittaasua oqarpoq.
Akiliinissamik nukingisaarutit kingulliit qisuariarfigineqanngippata arsaarinnittarnerit Akileraartarnermut Pisortaqarfimmit ingerlanneqaleraluar-pata iluaqutaasinnaannginnerlunimi:
- Taannartaa soorunami iluaqutissartaqassagunaraluarpoq, kisianni ilisimanngisanik peqartuartarpoq, taamaattumik inuk pitsaasumik sullinneqassappat ilisimannissuseq annertunerusariaqarpoq, Søren Alaufesen naggasiilluni oqarpoq.