KANUKOKA: Kommuninik iluarsartuusseqqinneq suli naammassineqanngilaq
- Kommunit kattunnerisigut sumiiffinni oqartussaaqataanikkut sapanginneqarsimasut iluarsiniaraanni naleqqussaanissaq pisariaqarpoq. Aammalu allaffissornikkut aaqqissuussinikkullu iluarsisassat imaannaanngitsut kommunini maanna ukiuni sisamani atuutereersuni naammattuukkavut nakkaannarfigiaarpallaartariaqanngilavut, KANUKOKA-mi siulittaasoq allappoq.
Kommunit aaqqissuussaanerat atulersimasarput inaarutaasumik isummerfigitinnagu innuttaasut politikerilluunniit kommunini nutaani periarfissat misissussallugit puigussanngilaat, Martha Abelsen isumaqarpoq.
Innuttaasunik sullissinerup pitsanngorsarlugulu pisariillisarneqarnissaanik anguniakkap kommunit aaqqissuussaanerata allanngortinneqarnerani qitiusup killiffia inerniliiffisissallugu aamma piaarpallaarpoq, Martha Abelsen aamma oqarpoq. Aammami ukiuni siullerni sisamani ineriartornerup nalilersorneqarnera suliluunniit naammassinngilaq.
- Aammami aaqqissuussaanermik iluarsaaqqinnermi anguniakkat tunngaviusut ilaat - tassa suliassaqarfinnik Namminersorlutik Oqartussanit kommuninut nussuinissaq - suli kissaatigineqartutut annertutigisumik pisimanngilaq. Naliliinermi tamanna aamma eqqarsaatigisariaqarpoq, Kalaallit Nunaanni Kommunit Kattuffianni, KANUKOKA-mi, siulittaasoq, Martha Abelsen, allappoq.
Ukiortaami oqaaseqaammini aamma allappoq, sumiiffinni oqartussaaqataaneq 2009-p kingornatigut ilungersunartorsiulersimasoq. Tamanna tunngavigalugu iliuuseqartariaqarpugut. Taamaattumik isumalluarnarnerarpaa 2014-imi sumiiffinni siunnersuisoqatigiinnik pilersitsisdinnaaneq nutaamik periarfissiniarneqarmat. Sumiiffinni siunnersuisoqatigiit qanimut oqartussaaqataanermi attaveqaatitut atorneqassapput - kommunalbestyrelsit suleqatissaattut.
