KANUKOKA borgmesteri taperserpaat

Kangerlussuarmimi ikaartarfimmut akisussaaffik Namminersorlutik Oqartussanit kommunimut tunniunneqarsimanngisaannarpoq, Martha Abelsen oqarpoq:

- Tunngaviusumik kangerlussuarmi kommunit akisussaaffiinik tunniussinerni isumaqatigiissummi ikaartarfiit taagorneqanngillat. Aqquserngit taakkartorneqarput kommunit akisussaafigiuagaattut soorunami isigalutigit. Kisianni ikaartarfinnut tunngasut isumaqatigiinniutigineqarnikuunngillat. Taamaattumik uagut tungitsinninngaanniit, Hermann Berthelsen, taperserparput isumaqaratta Namminersorlutik Oqartussat ataanni akisusaaffik taanna inissisimasoq Martha Abelsen oqarpoq.

Eqqarsaqqajaananngila ikaartarfiit aqqusinermut ilaaginnartuusut?

- Uanga illillu taanna radioaviisikkoorlugu nalilersorsinnanngilarput, isumaqatigiinniarnerni  oqaatsimik ataatsimilluunniit taaneqarsimanngimmata, isumaqarpunga naalakkersuisullu taanna aalajangerumaaripput, Martha Labansen oqarpoq.

Ikaartarfimmut kina inatsisitigut akisussaanera pillugu akissutisinissamik tungaanut kommunmiit ikaartarfiugallartussaq kingornatigullu aamma ikaartaffissaq ataavartussaq pillugu maanna aaqqiissutissarsiorput.

Kisianni imaanngilaq, ikaartarfimmut akisusaaneq kommunip tigussagaa, Hermann Berthelsen oqarpoq:

- Suliassat unittuunnginniassammata kommuneminngaanniit isumaqarsimavugut ukiunnginnerani, kangerlussuup kangerluata sikunnginnerani, qanoq iliuuseqartariaqartugut. Qanorlu iliuuseqarnerput tassa massakkut ingerlavoq; ikaartarfiugallartussamik ujarlerneq aammalu ikaartarfimmik ataavartussamik piaartumik atortussaanik piniarneqartussanik piniarnerit ingerlanneqarnera. Taakkua uagut akisussaaffittut tiguagut, kisiannili imaanngilaq akilertussanngornissaa taanna isumagigipput. Taanna assertuussutigissavarput, suliassarli ima pingaaruteqartigaaq massakkut taanna piaarnerpaamik suliarineqartariaqarluni, Hermann Berthelsen oqarpoq.

Qeqqata Kommuniata Namminersorlutik Oqartussanit akunniliuttoralugit Danmarkimi illersornissamut ministeqarfimmut saaffigininnikuuvoq, tassanngaanniit ikartarfiugallartussamik sananissamik ikioqqullutik.

Kangerlussuarmi ikaartarfik kimit akisussaaffigineqarnersoq pillugu, KANUKOKA-p saaffiginnissutaa Nunap iluani pissutsinut naalakkersuisup Anthon Frederiksenip tigusimallugu uppernarsarpaa.

Taassuma suliap sukkanerpaamik suliarineqarnissaa oqaatigeriarlugu, sukumiinerusumik KNR-imut oqaaseqarusunngikkallarpoq.