Kansas-imi tornado takkuteqqissinnaavoq
USA-p qiterpasissortaata kitaa sapaatip akunnerata naanerani anorersuarnit kaavittuliortunit arlalinnit aqqusaarneqarpoq. Kansas-imi illoqarfik nunaannarmiittoq Greensburg eqqugaanerpaavoq, taannami anorimit aserorneqarluinnarsimagami. Sapaatip akunnerata naanerani anorersuareernerata kingornagut aaqqissuussisoqaleruttorpoq, kisianni innuttaasut silarloqqinnissaanut piareersalereertariaqarput.
Angutip Oklahomamiup anorersuit kaavittuliortut mianerisassaanerat paasilluarpaa. Anorersuarmit kaavittuliortumit 100 meteriinnarnik ungasissuseqarluni biilini illuartissinnaavaa. Peqatigitillugu orpiit orpikkallu nunamit amuneqariarlutik qangattaanneqartut filmiliarai.
Sapaatip akunnerata naanerani USA-p qiterpasinnerusuata kitaani silarlorujussuarneranit inuit qulit ajunaarput 60-illu ajoquserneqarlutik.
Naalagaaffimmi Kansas-imi illoqarfeeqqami Greensburgimi 1500-nik innuttaqaraluartumi suut tamarmik tinginneqarsimapput. Illuusimagaluartuni qarmasissiat kiserngorussimapput. Inuit angerlarsimaffigisimasaanni qisuit seqummakut sinnerussimapput. Orpiit napagaluarput, pilutaalli teqqarsimapput. Sekundialunnguit ingerlaneranni upernaap ilisarnaatai teqqarneqarput.
Kansas-imi Guvernørip oqaatigaa ukiuni arlaqalersuni aatsaat taamak sakkortutigisumik silarlussiorlutik.
Naalagaaffiup ilaata silarlummit aatsaat taamak sakkortutigisumik eqqorneqarnera takullugu Guvernøri oqaluttuarpoq.
Greensburgimi suut tamarmik aserorneqarfigisimasaani aamma uiverneqarpoq. Sakkutuut sisamat politeerlu ataaseq tigusarineqarsimapput, silarloreernerani pisiniarfissuarmi imigassanik sikaritsinillu tillinniarsimasutut. Aamma angutit marluk Røde Korsimi sulisutut atisalersorsimasut aamma ujajaasimasutut tigusarineqarput.
USA-p qiterpasissuata kitaa piffissami aggersumi sakkortunerusumik silarlummit eqqugaasinnaavoq, tassami maanna kaavittunik anorersuartarnerata naligaa anorersuartarneralu maajimi juunimilu ingasannerpaasarpoq. Naatsorsuutigineqarporlu anorersuit kaavittuliortut 170-it aqqusaarumaartut.
Anorersuit kaavittuliortut pilertarput sakkortuumik sialuttalimmik kallertillugu, tassa silaannaap isugutasup kissartullu aamma silaannaap panertup nillertullu aporaannerisigut.
