Kangilinnguani saliinissaq akisunaaleraat

Saliinissarmi 33 mio. koruuninik akeqartussatut missingersuutigineqaqqaartoq, ukiorpassuarni uuliamik mingutsitsisoqarsimanerata kingunerisaanik maanna ikinnerpaamik 80 mio. koruuninik akeqartussanngorpoq.

Folketingip naalagaaffiup missingersuutaanik kukkunersiusartuisa siulittaasuata nuutsitsinissamik aalajangerneq pitsaasumik toqqammaveqartumik ingerlanneqarsimanersoq maanna misissortussanngorpaa.

- Isumaqarpunga suut tamaasa misissornissaat isumatusaarnerussasoq. Folketingimmi aalajangernerani aningaasartuutissat ilaasa ilanngutinngitsoorneqarsimanissaat qularutiginngilara, Peder Larsen aviisimut Dagbladet Politikenimut oqarpoq.

Februaarimi 2012-imi - Folketingip maajimi 2011-mi nuutsitsinissamik aalajangernerata kingorna - Illersornissamut ministeriaqarfik, Namminersorlutik Oqartussat Kommuneqarfik Sermersoorlu Københavnimi ataatsimeeqatigiipput. Ataatsimiinnerullu imaqarniliorneqarnerani atuarneqarsinnaavoq Kangilinnguani ukiuni 70-ini uuliamik mingutsitsisoqarsimaneranik saliinissaq 100 mio. koruunit tungaannut akeqartussatut nalineqarsimasoq.

Akiligassaq taamaasilluni qaammatut qulingiluat ingerlanerini pingasoriaatinngorsimavoq.

Februaarimi ataatsimiinnermi aamma aalajangerneqarpoq peqataasut tamarmik misissussagaat sumiiffik siunertamut allanut tuninineqarsinnaanersoq. Ataatsimiinnermili peqataasut arlallit ullumi nassuerutigaat pilersaarut taanna piviusunngorsiortuunngitsutut siumut nalilerneqareersimallugu.

Tusarfiit ilaannit Politikenimut oqaatigineqarpoq, Kangilinnguit tunineqarnissaat sakkutooqarnerup tungaanit kissaatigineqarsimanngitsoq, taamaaliortoqassappat sumiiffiup tunineqareernerata imaluunniit attartorneqarnerata kingona saliinissamut akiligassaq ukiorpassuit qaangiunnerini akilerneqartussaassanngornissaa annilaangatigineqarmat.

Illersornissamut ministeriaqarfiup Politikenimut paasissutissiissutigaa Kangilinnguanit nuunnermut piumasaqaatit inaarutaasussat Namminersorlutik Oqartussanut suli isumaqatiginninniutigineqartut.