Kangilinnguani sakkutooqarfiusimasoq pisortatigoortumik matuneqarpoq
Sakkutooqarfiup KNR-imut ullumi nalunaarutigaa teknikerit Kangilinnguanut ullumi tikissimasut, antenneqarfillu tassani pisortatigoortumik matullugu. Antenneqarfik nutaaq Kangerlussuarmiittoq taamaasilluni maanna atulerpoq.
Arsuullu eqqaani ukiuni 63-ini sakkutooqarfiusimasoq pisortatigoortumik maanna atorunnaartoq, sakkutooqarfimmi immikkoortortami pisortap Michael Hjorthip oqaatigaa:
- Sakkutooqarfik amerikamiunit 1951-imi akisussaaffigileratsiguli maanna matuneqarpoq, oqaluttuarisaanermilu tamanna immikkut taasariaqarpoq, tassami sakkutooqarnerup oqaluttuarisaanerani pingaarutilittut nalilertariaqarluni. Tamaani sulisuunikunut attortinnassaqaaq, sakkutooqarfimmi immikkoortortami pisortaq Michael Hjorth Radioaviisimut oqarpoq.
Issittumi Sakkutooqarfik Nuummut 2012-imi oktobarimi nuunneqarmalli Ivittuuni antenneqarfik suli atorneqarpoq, Kangerlussuarmili antenneqarfik nutaaq maanna atorneqalernikuulluni.
Kangilinnguani antenneqarfiup atorunnaarnera pissutaalluni sulisut kingulliit aamma angerlartinneqarput, Danmarkimilu sakkutuut qullersaqarfiat Kangilinnguani sakkutooqarfik maanna matuittussanngorpaat.
Imermik innaallagissamillu pilersuineq, kiassarnerlu septembarip naajartulernerani unitsinneqassaaq, sulisullu sakkutooqarfimmik matusisussat kingulliit umiarsuarmi najugaqarallartinneqassallutik.
Sakkutooqarfik qanorpiaq isilluni qimanneqassanersoq pillugu suli isumaqatigiinniutigineqarpoq, matuneqarlunilu saliisoqarnissaa ataatsikkut taamaammat pissanatik.
Kangilinnguani sakkutooqarfiusimasumik saliinissaq pillugu Namminersorlutik Oqartussat maanna saaffigineqassapput, piumasaqaatit suunersut tassani paasiniarneqassallutik.
