Kangilinnguani anorlingaarmat inuit aneqqusaajunnaarput

Anorersuup ulussaarsuartut sakkortutigisup nunatta kujataa ulluni kingullerni aqqusaarpaa.

Sumiiffiit arlallit anorlersimaqaat allaat nalunaaquttap akunneranut 200 kilometerisut anori sukkasuseqarsimavoq. Tamanna aamma Kangilinnguani sakkutooqarfiup misigisimavaa.

- Maani kujataani anorersuarsimaqaaq, ulussaarsuartut sakkortutigisumik anorersuarpoq. Anoraalu kissarmat aput qaqqamiittoq ingerlaannaq aappoq.

Tassa imaappoq, anorersuarmiit suli sakkortunerusumik anorlerpoq, tassami sekundtimut 60 meeteri angusarmagu, assigaalu akunnerup ataatsip ingerlanerani 200 kilometeri angusarlugu anorersuartoq, Kangilinnguani sakkortooqarfiup avammut tusarliisartua Alex Jensen taama oqaluttuarpoq.

Taanna nangilluni oqaluttuarpoq, ippassaq nalinginnaasumik sulineq ingerlanneqarsimagaluartoq ualiartorneranili anori sualutsikkaluttuinnarmat killilersuisariaqalersimallutik.

- Ippassaq unnukkut inunnik aneqqusiunnaavippugut, inuit angerlarsimaannartariaqalerput sulisimagunillu suliffimminniiginnartariaqalerlutik. Silami aniffigineqarsinnaanngilluinnaqqissaarmat, Alex Jensen oqarpoq.

Kangilinnguani sakkutooqarfiup qulimiguulinnut mittarfiata isersimaartarfiata igalaava aserorsimavoq, puttasuliarlu pusissimavoq, aqquserngullu qullia savimineq niunngarsimalluni. Kangilinnguit maanna nittaallernerarpaat, sakkortooqarfiullu naatsorsuutigaa sapaatip-akunnerata naanerani aamma anorersuaqqikkumaartoq.