Kangiani Qiterlermi eqqissiviilliornerit ingatsipput

Libanon-imi Hizbollah-p sorsukkumatoortai Israel-imiut sakkutuuinik marlunnik tigusarinnereermata kangiani qiterlermi eqqissiviilliornerit ingatsipput. Israel-imiut sorsuttartui Libanon-imut akiniaallutik aallartipput, Israel-imiullu Libanon-imut killeqarfiup eqqaani najugallit qimaaffissianut qimaaqquneqarput.

Israel-ip Libanon-nillu killeqarfiani Israel-imiut sakkutuui marluk nakkutilliisuusut tigusarisimagitsik Hizbollah-p nammineq TV-qarfianit nalunaarutigineqarpoq.

Sakkutuut allat marluk saassussinermi toqutaasimasut Israel-imiut TV-qarfiannit oqaatigineqarpoq.

Israel-ip premierministeria Ehud Olmert immikkut ittumik ataatsimiisitsivoq, akiniaaniarlutillu saassussillutik. Israel-imiut sorsuttartui Libanon-imi saassussinerminni ilaatigut ikaartarfik saassussimavaat, inuinnarnik marlunnik toqutsillutik tallimanillu ikiliillutik.

Hizbollah-lu rakettinik igeriussimmat Israel-imiut sisamat toqutaasimapput.

Arabiamiut parnaarussat iperagaanissaat anguniarlugu Israel-imiut sakkutuui tigusarisimagitik Hizbollah nassuiaavoq.

Ilimanarporlu Hizbollah-p piumasani pissagaa.

Pereersummi takutippaat Libanon-imiut Israel-imiunik tiguaagaangata, tiguakkat iperagaasinniarlugit Israel-imiut naalaannartarsimasut. Israel-imiut namminneq Libanon-iliarlutik, tigusanik aniguisitseriarsinnaaneq ajoramikkit Libanon-imiut piumasaannut naalaannartariaqartarput.