Kangia Race: Aasiammiut Sisimiormiullu ajugaasuupput

Arnat angutillu unammineranni ullormi siullermiit pissanganartorsiortoqarpoq. Angutini siulliit marluk minutsinik marluinnarnik nikingapput arnanilu siulliit tulliilu minutsit marluk ataallugit nikingallutik. Arpannermi katillugit 50 kilometeri sinnerlugu arpattoqarpoq. Arpaffik Ilulissat eqqaanni pinngortitamiippoq unnuillu marluk tupermi unnuisoqarluni.

Team SSP Angunnguaq Sisimiuneersut ajugaapput arnani Torrak Team ASP ajugaasut. Arnat angutillu akuleriillutik unammineranni Team Møller Heimann Sisimiuneersut ajugaapput.

Arnani ajugaasuusartut allanngorput ukiut sisamat kingulliit Team Anuni Aasianneersut ukiormanna Torrak Team ASP-mit Aasianneersunit anguneqarmata.

Aqqutissamik toqqaaneq

- Ulloq siulleq siuarluaraluaratta qummukajaakkoorlutali angutilluta. Ulloq siulleq minutsit marluk sekundillu 30-it taamaallaat siuaqqalaarpugut. Ullup aappassaa ingiaqatigiippugut Ilulissat eqqaanni nuna aqqutissarput ilisimavallaannginnatsigu. Aamma uninngaffimmi nalunaarfissami korti nassataarput tammaagaluaratsigu sekundinik 30-nik annaasaqarpugut, Torrak Team ASP-meersoq Paneeraq Sandgreen oqaluttuarpoq.

Angutit unamminerat pissanganavippoq. Team Nuan Ilulissaneeerssut ulloq siulleq aallartilluarput siuartuullutik. Taamaattoq ullup aappassaa pingajuallu Team SSP Angunnguamit aamma Team Olsenimit anguneqarput.

- Taktik aamma ingerlavissamik toqqaaneq aalajangiisinnaaqaat. Toqqagassat tassaasinnaapput qooruartap imaluunniit qaqqap qaavatigoorneq imaluunniit aputilikkoorneq. Toqqaanerlioraanni piffissamik annertuumik annaasaqartoqarsinnaavoq, Hans Lars Olsen Team Olsenimeersoq oqarpoq, taakkulu ulloq siulleq pingajuattut inissikkaluariarlutik naammassinerani tullersortaallutik apuupput.

Team Møller Heilmann Sisimiuneersut arnat angutillu akuleriillutik unammineranni ajugaapput.

Peqataasut tamarmik tupeq unnuinermullu atortut namminneq nammattarpaat arlallillu ikumasartulisannginnissaq toqqarpaat nassatat oqinneruniassammata.

- Unnuap aappaa qiianarmat qiulingaatsiarlunga sapaammi iterpunga ullorlu taanna immikkoortoq kingulleq arpattussaallugu, Paneeraq Sandgreen oqaluttuarpoq.

Angusat tamakkiisut Kangia Racep Facebookimi qupperneraniipput peqataasullu namminneq assilisatik misigisalikkersaarutitillu tassunga aamma ikkussimavaat.

Kangia Race 2020:

Angutit:

1. Team SSP Angunnguaq (Sisimiut) – Majaq Heilmann, Bjarne Hansen 7.25,58 timer

2. Team Olsen (Sisimiut) - Hans Lars Olsen, Nukappiannguaq Olsen 7.55,50 timer

3. Team Nuan (Ilulissat) – Vittalius Lennert (16 år), Frederik Petersen 8.09,43 timer

Arnat angutillu akuleriit:

1. Team Møller Heilmann (Sisimiut) – Hemi Heilmann, Qulutaq Møller 7.59,45 timer

2. Ivulni (Aasiaat) – Najannguaq Sandgreen Olsen, Erni Lange Olsen 8.44,20 timer

3. Lukas Aput (Ilulissat)  Regine & Søren Mathiassen 10.06,45 timer

Arnat:

1. Torrak Team ASP (Aasiaat) – Andrie Sørensen, Paneeraq Sandgreen 9.15,52 timer

2. Team Anuni (Aasiaat) – Hanne Kristiansen, Dorannguaq Eriksen Nielsen 9.16,58 timer

3. Team Turtle (Ilulissat – Marianne Nissen, Katrine M. Fly 15.11,48 timer