Kangia Qiterlermi nakuusernerujussuaq pillugu Pave avoqqaarinnippoq
Israelimiut Palæstinamiullu akunnerminni akerleriileraluttuinnarnerat Vatikanemi katuullit paaviata ernumagilluinnalerpaa.
Pave Frans ullumi sapaammi oqaluussinermini Israelip Palæstinallu akornanni aaqqiagiinnginnerup sakkortusiartuinnarnera eqqartorpaa.
- Inuit toqorartuarnerat ullut tamaasa annertusigaluttuinnartoq taakkualu akunneranni piuartoq, tatiginninnitsinnik qamititsisarpoq, pave taama oqarpoq.
Oqalugiarnerminilu toqqarlugit eqqartorpai qimaasunut ineqarfimmi illoqarfimmi Jeninimi israelimiut sakkutuuisa palæstinamiunik sisamanngormat toqutsinerat, taamatuttaaq eqqaallugu palæstinamiup angutip juutit oqaluffiata eqqaani inummik nalinginnarmik sakkutuujunngitsumillu tallimanngormat toqutsinera.
Pisullu taakku marluk nakuusernerit piuartut ilaminiinnannguaraat, ukiormi nutaaq aallartimmalli palæstinami Israelimilu inuppassuit toqutaasarsimapput, pavelu ima nangippoq:
- Ukioq nutaaq aallartimmalli palæstinamiorpassuit 1000-likkaat Israelimiut sakkutuuinit toqunneqarput, pave oqarpoq nangipporlu:
- Nunat taakku marluk nunarsuarmilu nunat tamalaat kajumissaarusuppakka aqqutinik allaanerusunik ujartueqqullugit – matumani oqaloqatigiissinnaassuseqarnerit, eqqissinerlu anguniaqqunaqaat, pave oqarpoq.
