Kangia-Kitaata kommunissaani illuatungiliuttut qisuariarput

Demokraatit partitut allannguuteqarnerat pissutigalugu Kangia-Kitaani kommunissamut illuatungiliuttut maanna qisuariaateqarput. Kommunit Kangia-Kitaani kattunnissaannut piareersarneq innuttaasut pillugit piareersarnerunani, sunaluunniit akigalugu pissaanermik tigumminninnissamik qulakkeerinninniarnerinnaanerarlugu Siumumit Atassummillu oqaatigineqarpoq.

Partit taakkua isumaqarput Inuit Ataqatigiit, Demokraatit Ivittoormiullu isumaqatigiissutaat, Demokraatit siulittaasuminnik, Per Berthelsenimik uppititsinerisa kinguneranik ajalusoortoq. Kiisalu borgmesterip tullersortissaattut siullertut qinigaasoq, Per Berthelsen, tunuliaquteqannginnerarlugu, oqarlutillu taanna piareersarnermi ataatsimeeqataanngisaannartoq.

Taamatuttaaq borgmesterinngortussaq Asii Chemnitz Narup ajornartorsiutinik qillarissaaniarsarisutut isornartorsiorpaat, suleqatigiissutissatut isumaqatigiissut suleqatigiit tamarmik ataasiakkaarlutik atsioreermassuk isumannartoqannginnerarlugu oqaluttuarsinnarmat.

- Asii Chemnitz Narup aamma Inuit Ataqatigiit akisussaanerpaatut uittariaqalerput pissutsillu piviusut nassuerutigalugit:

- Suleqatigiissutissaq qanorluunniit ikkaluarpat suleqatigiinniartussaagaluit avissaartuupput, Siumut aamma Atassut allapput.

Illersorneqarsinnaanngitsumik inissisimaneq qimanneqarsinnaaniassammat Kangia-Kitaani suleqatigiinniartut Siumumik Atassummillu isumaqatigiinniaqqullugit kajumissaarneqarput.

- Siumut aamma Atassut isumaqatigiinniarnissamut suli piareersimapput, partiit taakkua allakkatik ammasut taama naggaserpaat.