Kangersuatsiami heliporti eqqagassaqarpallaarmat matuneqartoq
- Upernaviup eqqaani Kangersuatsiami qulimiguulinnut mittarfik isumannaallisaaneq pissutigalugu Mittarfeqarfinnit matugasuarneqarpoq, Mittarfeqarfiit tusagassiuutinut nalunaarummi taama allapput.
Kangersuatsiami heliportip ungasinngisaani eqqaaveqarfeqarpoq, eqqagassallu mittarfimmut siaruartilersimapput. Eqqagassat pillugit pissutsit iluarsiivigineqarnissaat siunertaralugu Mittarfeqarfiit Avannaata Kommunianut saaffiginnissuteqarsimagaluarpoq, kinguneqanngitsumilli.
- Puussiat plastikkit eqqakkallu allat qulimiguullip papiata sarpianut nermussinnaapput tamannalu isumannaallisaanikkut navianarluinnartutut Mittarfeqarfinnit isigineqarpoq, Mittarfeqarfinni ingerlatsinermut pisortaaneq Niels Grosen oqarpoq.
- Qulimiguulinnut mittarfiup ingerlaannaq matuneqarnissaa taamaattumik aalajangerparput eqqagassat tungaatigut kommunip iluarsiinissaata tungaanut, Niels Grosen oqarpoq.