Kangermi terianniaq saassussisoq
Terianniaq inummik Nuup nunaqarfigisimasaani Kangermi arfininngormat saassussisimasoq, politiit nalunaarutigaat. Saassussineq arfininngormat ualikkut nalunaaqutaq tallimat missaanni pivoq, terianniarli pisarineqarsinnaasimanani.
Allattoq Louise M. Kleemann
Terianniat eqqumiiginarsinnaasumik pissusilersortut Nuummi politiinut nalunaarutigineqartassapput, terianniarlu saassussisimasoq toqunneqassappat uummataatigut aallaaneqarnissaa politiit kajumissaarutigaat, terianniaq perlerorsimanersoq misissorneqassappat niaqua misissorneqartussaammat.
Qimmiutillit qimmiutiminnik nakkutiginnilluarnissaat politiit kajumissaarutigaat, qimmiutimillu perlerornermut akiuussutissamik kapineqarsimanissaat kaammattuutigalugu.