Qilalugaq qernertaq Kangerlussuarmi qinngusimasoq immikkut akuersissuteqarnikkut ippassaq pisarineqarpoq.
Qilalugartuuvoq Maniitsormi aalisartoq piniartorlu Svend Heilmann. Taassuma qilalugaq aallaallugu pisaraa, qilalugarlu Maniitsormiunit alutorsaatigineqarsimaqisoq Svend Heilmann oqaluttuarpoq:
- Aasarisseruttornerani aappaatigut eqqumiikujuppoq taama kiatsigisumi pisaqarluni. Ippernat niviukkallu akornganni kiassuullu ataani pilallugu nuannerlunilu eqqumiilaarpoq, Svend Heilmann oqarpoq, nangillunilu:
- Niaqua sarpissuilu Kalaalimineerniarfiup silataani massakkut takusassiarivagut, inuppassuillu alutoreqaat, assiliisorpassuupput, immikkullu pisiumasoqaraluarami taamaaliorsinnaatitaanngilanga, una immikkut pisaajugami, Svend Heilmann oqarpoq.
Qilalukkap mattaa neqaalu utoqqaat illuannut napparsimmavimmullu agguaanneqarpoq, meeqqeriviillu aamma tunineqarput, soorluttaaq Kangaamiuni utoqqaat illuat mattammik neqimillu tunineqartut.
Qilalugaq pisarineqartoq 5 meterinik takissuseqarpoq, tuugaavatalu nuisasortaa 2 meterit sinnilaarlugit takissuseqarsimalluni.
